“Asian movie pulse” вэбсайтаас гаргасан 2024 оны шилдэг 30 ази кино жагсаалтыг гаргажээ. Эл жагсаалтын 22-т өнгөрсөн сард Таллины кино наадмын гранпри шагналыг хүртсэн Монголын уран сайхны “Silent city driver” буюу “Чимээгүй хотын жолооч” кино жагсжээ.
Эл киноны талаар тус сайтын нийтлэлч Марина Рихтер “Бараг бүхэлдээ өнгөгүй ч гэмээр, өргөн дэлгэцийн хэмжээгээр зураг авалтаа хийсэн Э.Энхбаяр зураглаачийн ажил болох “Чимээгүй хотын жолооч” кино гол дүрийн баатрын дотоод сэтгэлийн харанхуй байдалд нийцсэн түгшим уур амьсгалд үзэгчийг аваачих шиг санагдсан. А.Түвшинбаярын хүчтэй дүрслэл уг киноны хөдөлгөгч нэг хүч юм. Гол дүрийн ганцаардалдаа баригдаж, хорих ангиас гарсныхаа дараа гадаад орчинтой дасан зохицох гэж зовж байгааг нь үнэхээр гайхамшигтай харуулжээ. Ер нь тус киноны жүжигчид бүгд чамгүй сайн, чансаатай бөгөөд зохиол сайтайгаас гадна “Амьдрал”, “Цагаан хадаг” зэрэг кинонууд дээр хамтарч байсан кино зохиолч Т.Номуунзул, Ж.Сэнгэдорж найруулагчийн ээлжит нэгэн бүтээл юм. Тэд дахин нэгдсэний үр дүн тун амттай болжээ” хэмээн бичсэн байна.
“Чимээгүй хотын жолооч” киног ирэх онд эх орондоо нээх хийх бөгөөд бүх кинотеатраар гаргах аж.
