“Bortua” брэндийн үүсгэн байгуулагч, загвар зохион бүтээгч Бортуаг онцлон танилцуулъя.
Ажлын гараагаа “Монгол костюмс”-т дизайнераар ажиллан эхлүүлсэн Бортуа 2013 онд олон улсын үндэсний хувцасны фестивальд “Дөрвөлжин бичиг” коллекцоороо эх орноо төлөөлөн амжилттай оролцож байв. Түүнчлэн 2014 онд “Дайчин” коллекцоо олны хүртээл болгож байлаа. Улмаар 2014 онд үндэсний өв соёлоо түгээн дэлгэрүүлэх зорилгоор үндэсний хувцас загварын урлангаа “Bortua” нэрээр нээж, 2023 онд албан ёсоор “Bortua” ХХК болгон өргөжүүлж, үйл ажиллагаагаа тэлэн, бараа бүтээгдэхүүнийхээ тоог нэмэн цар хүрээгээрээ улам өргөтгөөд буй.
Үндэсний хэв загвартай хувцасыг орчин үеийн, өдөр тутмын, гоёлын, тайзны, түүхэн уламжлалт зэргээр төрөл бүрийн загвартай хоршуулан урласаар ирсэн тэрбээр Монголын хувцас загварын хамгийн том наадам болох “Гоёл” наадмаас 2018 онд шилдэг загварын товчоо, 2019 онд шилдэг залуу дизайнер, 2020 онд тус наадмын гранпри шагналыг хүртэж байв.
Тэрбээр “Radice”, “Бахархалт үндэсний хувцас” зэрэг коллекцуудыг гаргаснаас гадна улирал тутамд, тэмдэглэлт баяруудад зориулан шинэ загваруудаа гаргаж хувцас загварт дурлагсдад хүргэсээр байна.
