Удам залгасан уран бүтээлч С.Ариунбямба тун удахгүй дэлгэцийн шинэ хоёр уран бүтээлээр үзэгчидтэй уулзах гэж байна. Тодруулбал, түүний тоглосон “В1 давхар” адал явдалт уран сайхны кино ирэх оны нэгдүгээр сарын 1-нээс нээс үзэгчдийн хүртээл болно. “Ирээдүй чинь Эр хүн таны гарт” гэдгийг харуулах эл киног “Mongol stunt team”-ийн залуус бүтээжээ. Мөн ирэх оны нэгдүгээр сарын 16-наас С.Ариунбямбын гол дүрд нь тоглосон “Бүсгүй” уянгын драмын кино олны хүртээл болно. Энэхүү уран бүтээлийг “Хурд” хамтлаг 30 жилийн ойдоо зориулан “Бүсгүй” дуунаасаа сэдэвлэсэн бүтээсэн аж.
Ташрамд дурдахад, Монголын тайз, дэлгэцийн урлагийн тод сод уран бүтээлч С.Ариунбямба СУИС-ийг 2000 онд төгсөж, ажлын гараагаа аавынхаа ажиллаж байсан Дундговь аймгийн Төв халх дуулалт жүжгийн театраас эхэлжээ. Тэрбээр тайзнаа “Худалч эхнэр” жүжгийн Уильям, “Гэрлэх гэсэн нь” жүжгийн Кочкарев гэх зэрэг дэлхийн болон Монголын 50 гаруй сонгодог жүжгүүдэд гол болон туслах дүрүүдэд тоглосон байдаг. Харин дэлгэцийн уран бүтээлийн гараагаа 2002 онд “Гашуун аялгуу” кинонд тоглосноор эхэлж, улмаар “Ану хатан” түүхэн уран сайхны киноны Данжила баатрын дүрээр үзэгчдийн эчнээ танил болж, өнөөдрийг хүртэл 30 гаруй дэлгэцийн уран бүтээлд тогложээ.
