“Mongol stunt team”-ийн залуус “В1 давхар” адал явдалт, тулаант уран сайхны кино бүтээснээ ирэх 2025 оны эхний өдөр буюу нэгдүгээр сарын 1-нээс олны хүртээл болгох гэж буй. Эл киног “Action crew” орлон тоглогчдын багийн ахлагч М.Наранбаатар найруулжээ.
Монголын кино урлагт “Action crew” гэх нэр анхлан танигдаж эхэлсэн нь 2006 он. Орлон тоглогчдын тус баг анх гурван хүний бүрэлдэхүүнтэй байгуулагдаж байсны нэг нь М.Наранбаатар юм. Дорнод аймагт төрж өссөн тэрбээр багадаа өглөө бүр Хэрлэн гол дээр очиж, бэлтгэл хийдэг байжээ. Түүнийг нь харсан “Шинэ ирээдүй” таеквондогийн клубийн багш Ц.Болдсайхан түүнийг клубтээ явуулж, бие хамгаалах урлагаар хичээллүүлж эхэлжээ. Дараа нь Дэлхийн нэгдсэн бие хамгаалах урлагийн клуб аймагт нь салбараа нээхэд н.Гантулга багштайгаа танилцан аякидо, жудо, каратэ, таеквондо зэрэг олон төрөлтөөр хичээллэж эхэлсэн байна. Тухайн үед тулааны урлагийн үзүүлэх тоглолт болдог, тус үзүүлбэрийг М.Наранбаатарын баг гүйцэтгэдэг байв. Эндээс түүний орлон тоглогчийн бэлтгэл эхэлжээ. 2006 оноос хойш М.Наранбаатар дотоодын “Үргээлэг”, “Босуул”, “Миний ах атаман”, “Говийн домог”, “Зүрхний хилэн” гэх зэрэг 50 шахам уран сайхны кино, Холливуудын “Marco Polo”, “Mulan”, “Shang Chi and the Legend of the Ten rings” тэргүүтэй 10 гаруй уран бүтээлд орлон тоглогч болон тулааны найруулагчаар ажиллажээ.
