Жүжигчин, хөтлөгч, продюсер Б.Батзаяа “Цорын ганц аав” уран сайхны киногоор үзэгчидтэй “уулзана”. Тэрбээр хамгийн сүүлд “Тайчигч” богино хэмжээний кино, “SBN” телевиз, “Sun” пикчерсийн хамтарсан “Их хааны буурч” олон ангит киногоор үзэгчидтэй “мэндчилсэн” юм.
Жүжигчин Б.Батзаяа КУДС-ийн кино драмын ангийн оюутан ахуйдаа “360 градус” хошин мэдээллийн продакшнаас уран бүтээлчийн гараагаа эхэлж, улмаар 2006 онд “SBN” телевиз байгуулагдахад орчуулгын киноны дуу оруулагч жүжигчнээр ажиллаж, цаашлаад албаны дарга, кино программын албаны продюсер, кино, гадаад контент хариуцсан продюсерын алба хашсан юм. Телевизийн их ажлынхаа зэрэгцээ дэлгэцийн уран бүтээлүүдэд ч дүр бүтээсээр яваа. Үзэгчид түүнийг “Зөрлөг”, “Маск”, “Миний ахын эхнэр”, “Дэлхийд дурласан сар”, “Валетины захидал”, “Дуудлага”, “Ар хударга”, “Зүрхэнд дуссан нулимс”, “Өртөө”, “Хайр-2”, “Шилдэг тоглогч” зэрэг уран сайхны кино, “Сонголт”, “Их хотын залуус”, “Suits” олон ангит киноны гол болон туслах дүрд тоглосноор нь эчнээ мэднэ.
