СУИС-ийн оюутан ахуйгаасаа “Boomtown” хамтлаг байгуулан уран бүтээлийн гараагаа эхэлж, улмаар УДЭТ-ын босгыг даван түүхэн, сонгодог, орчин үеийн олон жүжигт гол болон туслах дүрийг чадварлаг бүтээж явсан Б.Тамирыг өдгөө “Фантастик” продакшны найруулагч гэдгээр нь үзэгчид эчнээ мэднэ.
Энэ онд 17 жилийнх ой нь тохиох “Фантастик” продакшндаа Б.Тамир энэ хугацаанд дэлгэцийн 16 уран бүтээлийг үзэгч олонд толилуулжээ. Хамгийн сүүлд “Зура”, “Зура-2: Цурам ажиллагаа”, “Зура-3: Цэвэрлэгээ” уран сайхны киног хүргэсэн нь 2017 оноос өнөөдрийг хүртэлх хамгийн шилдэг борлуулалттай кинонуудын жагсаалтыг тэргүүлээд буй.
Тэгвэл найруулагч Б.Тамир дараагийн уран бүтээлдээ ханцуй шамлан оржээ. Тодруулбал, тэрбээр аавтайгаа хамт буюу Гавьяат жүжигчин, найруулагч О.Бат-Өлзийн хамт “Цөвүүн цаг” уран сайхны киног үзэгчдэд хүргэхээр ажиллаж байна. Энэхүү уран бүтээлийг ирэх гуравдугаар сард олны хүртээл болгохоор товлоод буй аж.
