Төрийн шагналт, Урлагийн гавьяат зүтгэлтэн, хөгжмийн зохиолч Э.Чойдогийн “Монголын сайхан орон” баримтат киноны хөгжмийг пянз болгон гаргажээ.
“Монголын сайхан орон” баримтат киног 1961 онд Ардын хувьсгалын 40 жилийн ойд зориулан “Монгол кино” болон БНАГУ-ын “Дефа” кино үйлдвэрийнхэн хамтран бүтээсэн түүхтэй. Тэр цагаас хойш “Дефа” кино үйлдвэрийн архивт хадгалж байсан эл бүтээлийн анхны эх хувилбарыг албан ёсоор авч, улсын баяр наадмаар эгшиглүүлэх санаачилгыг 2017 онд гаргасан байдаг. Улмаар уг хөгжмийн зохиолын анхны хувилбарыг хувилан авч, Монголын нэрт хөгжмийн зохиолчийн агуу бүтээлийг партитурын дагуу анх удаа албан ёсоор тоглох нөхцөл бүрджээ. Тэгвэл энэхүү бүтээлийг Үндэсний хөгжмийн их найрлаар тоглуулан, пянзанд бичүүлэх ажлыг Урлагийн гавьяат зүтгэлтэн, удирдаач Г.Буянбаатар санаачилсан аж.
Пянз нь хамгийн чанартай хөгжмийн дуугаралт бөгөөд он удаан жил хадгалж, хэдэн үе дамжуулан хэрэглэх боломжтойгоороо онцлогтой юм. Мөн орчин үед пянзны хэрэглээ нэмэгдэж, хамтлаг, дуучид уран бүтээлээ пянзанд мөнхлөх сонирхолтой болоод буй билээ.
