Монгол Улсын Ардын жүжигчин Г.Мягмарнарангийн 79 насны төрсөн өдөр өнөөдөр тохиож байна. Тэрбээр 1946 оны энэ өдөр буюу нэгдүгээр сарын 25-нд Төв аймгийн Лүн суманд мэндэлжээ.
Их урлагт үнэнч зүтгэсээр өдгөө 60 гаруй жилийг элээж буй тэрбээр театрын тайзнаа Д.Намдагийн “Шинэ байшинд” жүжгээр анхлан гарч, түүнээс хойш 120 гаруй жүжгийн гол болон туслах дүрд тогложээ. Хамгийн сүүлд гэхэд л тэрбээр өнгөрсөн онд “Мөрөөдлийн театр”-ын “Шөнө буусан аадар”, “Орфей” театрын “Амьдрахуй” жүжгүүдэд тоглож, тайзнаа “амьдарсан” юм. Харин дэлгэцийн уран бүтээлийнх нь тухайд түүний бүтээсэн “Тунгалаг тамир”-ын Цамба, “Агуйн нууц”-ын төлөөлөгч, “Далайд дусал”-ын офицер, “Хөх ногооны униар”-ын Бархас, “Мандухай цэцэн хатан”-ы Цэгц баатар, “Мөнх тэнгэрийн хүчин дор”-ын Ван хан Тоорил, “Үхэж үл болно” киноны Чингис хаан гэхчилэн олон арван дүр нь үзэгчдийн сэтгэлд хэдийнээ хоногшжээ.
