Нийслэлийн 35 дугаар сургуульд суралцаж, сурагч ахуйгаасаа сургуулийнхаа шинэ жилийн баяраар алиалагч, хөтлөгч хийдэг байсан Э.Цолмонбаярын авьяас хүүхэд наснаас нь илэрчээ.
Уран бүтээлийн гараагаа дөнгөж гуравдугаар ангийн сурагч байхдаа “Би эндээс явахгүй” кинонд тоглож эхлүүлсэн тэрбээр дунд сургуулиа төгсмөгц СУИС-д элсэж, оюутан цагаасаа “Шинэ үе” продакшнд ажиллаж эхэлсэн юм. Улмаар “ТВ коктейль” хамтлагийг байгуулж, “Халуун чинжүү” нэвтрүүлгээрээ үзэгчдийг зурагтын өмнө уяж байлаа.
Өдгөө “Сайн уу амьдрал минь”, “Намрын синдром”, “Мөнгөний гахай”, “Омарын эрэлд” гэхчилэн түүний тоглосон болон бүтээсэн уран бүтээлийн жагсаалт хөвөрнө. Тэрбээр сайн жүжигчин, продюсероос гадна шилдэг хөтлөгч. “Яг түүн шиг” нэвтрүүлгийг түүний хоолой, дүр төрхгүйгээр төсөөлөхөд бэрх.
Харин өдгөө Э.Цолмонбаяр орон нутагт аялал жуулчлалыг хөгжүүлэхэд өөрийн хувь нэмрээ оруулж буй. Тодруулбал, Архангай аймгийн “Ara complex”-д Монголын болон дэлхийн алдартай уран бүтээлчдийг цуглуулж, зуны хамгийн том фестивалийг тэрбээр зохион байгуулж байгаа юм.
Түүнд төрсөн өдрийн мэнд хүргэе.
