ССАЖЯ дэлхийн тэргүүлэх "Steinnway and sons" брэндийн их, бага гарын хоёр төгөлдөр хуур оруулж ирэн, Улсын Филармони болон ДБЭТ-т бэлэглэлээ. " Steinnway and sons" нь Германы брэнд бөгөөд хөгжмийн зэмсгийн дэлхийд тэргүүлэх үйлдвэр юм. Уг төгөлдөр хуурыг жилд тун цөөхөн тоогоор үйлдвэрлэдэг гэнэ. "Steinnway and sons" брэндийн цахим хуудсанд мэдээлснээс үзвэл, их гарын төгөлдөр хуур нь 150 мянган ам.долларын үнэтэй юм байна. Харин манайх 290 орчим сая төгрөгөөр оруулж ирсэн гэнэ.
Манай улсын мэргэжлийн урлагийн байгууллагууд Японы "Ямаха" брэндийн төгөлдөр хуур хэрэглэж ирсэн бөгөөд дээрх брэндийг анх удаа Монголдоо оруулж ирж байгаа нь энэ юм. " Steinnway and sons" нь дуугаралтаараа "Ямаха"-гаас илүү гэж мэргэжлийн төгөлдөр хуурчид үздэг юм байна. Даралтыг нь зааны ясаар хийдэг бөгөөд энэ брэндийг анх 1853 онд үйлдвэрлэж эхэлжээ.
Манайхаас бусад олонх улс орнуудад мэргэжлийн урлагийн байгууллагууд төдийгүй, сургуулиуд энэ брэндийг түгээмэл хэрэглэдэг аж. Тухайлбал, Хөгжмийн консерваториудын анги болгонд " Steinnway and sons" байдаг байна.
Б.УРАН /Өдрийн сонин/
