Дуучин The Weeknd өнгөрсөн долоо хоног /2025.01.31/-т “Hurry up tomorrow” нэртэй шинэ цомгоо цацаж, хөгжим сонирхогчдын дунд тэсрэлт хийсэн. Мөн тэрбээр тус цомгийнхоо хүрээнд “Lionsgate” кино компанитай хамтран “Hurry up tomorrow” хэмээх сэтгэлзүйн триллер жанрын бүрэн хэмжээний уран сайхны кино хийхээр болсоноо зарлаж, өөрөө гол дүрийг нь бүтээхийн зэрэгцээ давхар зохиолч, продюсероор ажиллана гэдгээ мэдэгдсэн юм.
Тэгвэл “Lionsgate” кино компанийн зүгээс The Weeknd-ийн шүтэн бишрэгчдэд зориулан киноны шинэхэн зургуудыг болон албан ёсны трейлерийг цацжээ.
“Hurry up tomorrow” бүтээлд The Weeknd-ээс гадна жүжигчин Женна Ортега, Барри Кеоган нар тоглосон бөгөөд найруулагчаар “Waves”, “It comes at night” зэрэг кинонуудаараа алдартай Трей Эдвард Шултс ажилласан байна.
Харин киноны үйл явдалд нойргүйдэх өвчтэй уран бүтээлч залуу үл таних, хачирхалтай нэгэнтэй учирч буй талаар харуулах аж.
“Hurry up tomorrow” киног энэ оны тавдугаар сарын 16-нд нээхээр товлоод байна.
