АНУ-д төвтэй хөгжим, энтертайнмент судалгааны “Luminate” компаниас “Luminate export power score” буюу тухайн оны дэлхийн хөгжмийн экспортод үзүүлэх улсын нөлөөллийн үнэлгээг гаргадаг. Тус компанийн мэдээлснээр уг зэрэглэлийг тухайн улсын уран бүтээлчдийн эрэлт хэрэгцээ, мөн тэдгээр дуу хөгжмийг импортолж буй улс орны тоо, тухайн зах зээлд тоглуулагдаж буй үзүүлэлт, олон улсын үзэгчдэд хүрч буй үзэлтийн тоо зэрэг хүчин зүйлсэд үндэслэн эрэмбэлсэн байна. Тэгвэл өнгөрсөн 2024 оны эл үнэлгээг АНУ тэргүүлж, Их Британи, Канад улс удаалж, тэдгээрийн араас Өмнөд Солонгос улс өнгөрсөн онд дэлхийн хөгжмийн дөрөв дэх том экспортлогч болж бичигджээ. Өмнөд Солонгосын араас Герман, Франц улс жагсаж, Пуэрто-Рико, Австрали, Швед, Бразил улс эхний аравт багтсан байна.
Сонирхуулахад, 2024 онд Японы “Spotify” платформ дээр хамгийн их тоглогдсон 50 уран бүтээлчид дунд Өмнөд Солонгосын олон артистууд багтсан байна. Тус жагсаалтын 14-рт “BTS” хамтлаг, 17-рт “Twice хамтлаг”, 18-рт NewJeans зэрэг уран бүтээлчид багтаж, К-поп урсгалын Японы хөгжмийн зах зээл дэх хүчтэй байр суурийг илтгээд буй. Түүнчлэн “Apple music” платформоос танилцуулдаг жагсаалтын дагуу Монголд хамгийн их тоглогдсон 100 дуунд Өмнөд Солонгосын артист Jennie, Rose нар дээгүүр бичигджээ.
