Алдарт “Guns N’Roses” хамтлагийн дуучин Axl Rose буюу Уилльям Брюс Рөүз Жуниор өнөөдөр 63 нас хүрч байна. Тэрбээр 1962 оны энэ өдөр буюу хоёрдугаар сарын 6-нд АНУ-ын Индиана мужийн Лафейетт хотод мэндэлжээ.
Таван настайгаасаа сүмийн найрал дуунд дуулсан Axl өсвөр насандаа ээж, хойд эцэгтэйгээ таарамжгүйн улмаас буруу зам руу орох шахжээ. Ингэж явахдаа тэрбээр рок хөгжимд дурлаж, насанд хүрмэгцээ мөрөөдлөө биелүүлэхээр Лос Анжелесийг зорьжээ.
Тэрбээр анх багын найзтайгаа “Hollywood Rose” гэх хамтлаг байгуулав. Улмаар хамтлагийн бүрэлдэхүүн хэд дахин өөрчлөгдөж явсаар 1985 онд “Guns N’Roses” нэрээр уран бүтээлээ туурвиж эхэлжээ. 1987 онд анхны цомгоо “Appetite For Destruction” нэртэйгээр гаргаж, эл цомог нь Америкийн хит-парадыг тэргүүлж харин Их Британийнхад тавд бичигдсэн байдаг. Ингээд 1993 он хүртэл “G N’ R lies”, “Use your illusion I”, “Use you illusion II”, “The spaghetti incident”зэрэг цомог гаргаж, эдгээр цомогт нь сонсогчдын эчнээ мэдэх супер хит дуунууд нь багтсан байдаг. Харин сүүлд 2008 онд “Chinese democracy” гэх цомог гаргасан бөгөөд өнгөрсөн 2024 оноос шинэ цомгийн ажил эхлүүлээд буй юм.
Axl хөгжмийн ертөнцийн хамгийн дуулиан шуугиантай амьдралтай, хэрэг зөрчил гаргадгаараа зартай хэдий ч зохиосон, дуулсан дуунууд нь үргэлж хит болдог. Түүний зохиосон “Sweet child O’ Mine” дуу Youtube-д нэг тэрбум удаагийн үзэл авсан 1980-аад оны анхны дуугаар тодорсон бол түүний “November rain” дуу нь мөн л нэг тэрбум хандалт авсан 1990-ээд оны цорын ганц дуу ажээ. Түүний уран бүтээлүүд “American music awards”, “BRIT”, “Грэмми” тэргүүтэй олон шагналд нэр дэвшиж, хүртэж байлаа.
