Жил бүрийн Гэгээн хайрын өдөр буюу Валентины баяраар “A sound” хамтлаг тоглолтоороо сонсогчдодоо бэлэг барьдаг. Өнөө жил ч уламжлал ёсоор эл тоглолт болно. Энэ жилийн тоглолтод “The lemons” хамтлаг хамтран оролцохоос гадна дуучин Чойжоо буюу Б.Чойжилсүрэн мөн бие даасан уран бүтээлүүдээ хүргэхээрээ онцлог аж.
“Хүрч чадахгүй”, “Хаврын ганц улиас”, “Санана даа”, “Чамд үлдээе” гэхчилэн хүмүүсийн сэтгэл зүрхний хөг, хэмнэлийг догдлуулсан хөнгөн гэмээр уянгалаг уран бүтээлүүдээрээ Монголын орчин үеийн хөгжмийн ертөнцийн нэгэн онцгой өнгө болсон дуучин Чойжоог өдгөө мэдэхгүй хүн үгүй.
Тэрбээр Хөгжим бүжгийн коллежид хийл хөгжмөөр суралцаж байхдаа ангийн найзуудтайгаа хамтран “The Pips” нэртэй хамтлаг байгуулж, уран бүтээл туурвиж эхэлжээ. Улмаар анхны цомгоо 2013 онд “Оддын дунд үлдсэн дүр” нэртэйгээр гаргаж, үргэлжлүүлэн өнөөдрийг хүртэл үг, аяа өөрөө зохиосон уран бүтээлүүдээ сонсогчдодоо хүргэсээр буй.
Ташрамд дурдахад, “Perfume” хэмээн нэрлэсэн “A sound”, “The lemons”, дуучин Чойжоо нарын хамтарсан хамгийн анхны тоглолт 2-р сарын 14-нд “АСА арена”-д болох юм.
