Монголын уран бүтээлчид Өмнөд Солонгосын уран бүтээлчидтэй хамтран “In da house-3: Korea” уран сайхны кино бүтээснээ ирэх гуравдугаар сарын 6-наас кинотеатруудаар үзэгчдийн хүртээл болгох гэж буй. Тус уран бүтээлд Өмнөд Солонгосын жүжигчин Юн Жэ Мүүн /Yoon Je-Moon/ дүр бүтээсэн юм.
1970 онд Өмнөд Солонгосын Сөүл хотод төрсөн Юн Жэ Мүүн уран бүтээлийн гараагаа театрын тайзнаас эхлүүлжээ. Тэрбээр “Ode to Youth” тэргүүтэй олон жүжигт тоглож байсан аж. Харин өдгөө тэрбээр театр, кино, телевизийн салбарт идэвхтэй ажилладаг бөгөөд өнгөрсөн онд л гэхэд түүний тоглосон “Red swan”, “Nothing uncovered” зэрэг телевизийн цувралууд үзэгчдэд хүрсэн байна.
Монголын үзэгчдийн “Iris” (2009), “The man next door” (2010), “The king-2:Hearts” (2012), “Dangerously excited” (2012), “Reborn rich” (2022) зэрэг кино болон цувралын гол дүрээр нь эчнээ мэдэх Юн Жэ Мүүн нь “In da house-3: Korea” адал явдалт, инээдмийн уран сайхны киноныхоо нээлтийн ёслолд оролцохоор манай улсад ирэх аж.
