Дэлхий нийтийн анхаарлыг татдаг алдарт “Mercedes benz”-ээс ивээн тэтгэдэг Нью-Йоркийн “Fashion Week”-т дизайнер Г.Золцэцэг буюу Кatya-Zol –ын загварууд оролцохоор болсон тухай бид өмнө нь мэдээлсэн билээ.
Өнөөдөр дизайнер Katya Zol “New-York Fashion Week” шоуныхаа талаар сэтгүүлчдэд мэдээлэл өгөхөөр хэвлэлийн бага хурал зарлалаа. Тэд 13 дугаар хорооллын шинэ замын гүүрний баруун талд байдаг Regency Residence-ын “Mexikhan” ресторанд 15.00 цагт хэвлэл мэдээллийнхэнтэй уулзаж, дэлгэрэнгүй мэдээллийг хүргэх нь ээ.
Сонирхуулахад, алдарт Манхэттэн дүүргийн Линкольн төвд болох “Мercedes Вenz” загварын долоо хоногт дэлхийн өнцөг булан бүрээс хүрэлцэн ирсэн 80 гаруй алдартай загвар зохион бүтээгчид өөрсдийн загварын коллекцийг танилцуулах нь ээ.
Дизайнер Кatya-Zol болон түүний багийнхан Монгол брэнд ноос ноолуур дэлхийн зах зээлд төслийг хэрэгжүүлэн Монголын үйлдвэрлэлийн үндсэн түүхий эд болох ноос ноолуур, арьс шир, нэхий болон гар урлалыг бүтээгдэхүүнийг дэлхийн зах зээлд таниулах, загвараар дамжуулж Монгол Улсаа дэлхий нийтэд сурталчлах зорилгыг өвөртлөн Mercedes benz-ээс ивээн тэтгэдэг Нью-Йоркийн “Fashion Week”-т “Чингисийн хатад” коллекцоороо оролцох юм байна.
Нью-Йорк хотыг зорих багт 20 гаруй хүн багтаж байгаа бөгөөд “Дэлхийд нэртэй Монгол” төрийн бус байгууллага , Соёл, спорт аялал, жуулчлалын яамны дэмжлэгтэйгээр “Hero entertainment”, дизайнер Г.Золцэцэг, маke-up artist стилист Э.Эрдэнэсувд, арьсан эдлэлийн загвар зохион бүтээгч н.Ундрах, загвар өмсөгч Г.Оюунгэрэл болон “Матрикс” салон “UBS” телевизийнхэн ажиллах юм байна.
Дизайнер Кatya-Zol-ын “Чингисийн хатад” коллецид Монгол хатдын ихэмсэг энхрий ялдам болоод хүчирхэг дүр төрхийг өнгөрсөн одоо ирээдүйг цагаар төлөөлүүлэн харуулах юм байна. Дизайнер Кatya-Zol бүтээлээ урлахдаа зөвхөн үндэсний түүхий эд болох ноос ноолуур, нэхий ,эсгий, сарлагын хөөвөр, арьсан бүтээгдэхүүнээр хийлгэж нарийн ур хийцтэй гоёл чимэг зүүлттэй хослуулан танилцуулна гэсэн шүү. Тиймээс өнөөдөр болох хэвлэлийн бага хурлыг зорин ирж илүү дэлгэрэнгүй мэдээллийг авах боломжтой юм.
