Монгол Улсын Хөдөлмөрийн баатар, Төрийн шагналт, Ардын уран зохиолч, Соёлын гавьяат зүтгэлтэн, хэл бичгийн ухааны доктор, нэрт сэтгүүлч, төр нийгмийн зүтгэлтэн Лодонгийн Түдэвийн мэндэлсний 90 жилийн ойн өдөр Монголын зохиолчдын эвлэл оны шилдэг богино өгүүллэг шалгаруулах “Утгын чимэг 2024” наадмаа хийлээ.
“Утгын чимэг” наадмын хамгийн анхны тэргүүн шагналтан Л.Түдэвийн гэгээн дурсгалд хүндэтгэл илэрхийлэн, “Эрхий дарам зай” өгүүллэгээр нь наадам нээлтээ хийсэн.
Уг наадамд анхнаас нь өнөөг хүртэл алгасалгүй оролцож ирсэн Төрийн шагналт, Ардын уран зохиолч Б.Догмид их зохиолчийн нэрэмжит наадамд хүндэтгэл үзүүлж, “Амь гуйсан өргөдөл” өгүүллэгээ толилуулав.
“Утгын чимэг 2024” наадамд 58 зохиолч бүтээлээ ирүүлэн өрсөлдсөнөөс сүүлийн шатанд 10 өгүүллэг шалгарч, Соёлын гавьяат зүтгэлтэн, Монголын зохиолчдын эвлэлийн болон “Алтан өд” шагналт зохиолч Б.Сарантуяагийн “Рэгдэндагва” өгүүллэг тэргүүн шагналыг хүртлээ. Мөн уран уншигчдаас Монголын зохиолчдын эвлэлийн “Утга зохиолын төлөө” шагналт жүжигчин Ө.Мөнгөнтулга шилдэг уран уншигчийн шагналыг гардлаа.
