Монголын уран бүтээлчид “In da house” адал явдалт, инээдмийн уран сайхны киног 2021 онд үзэгчдэд хүргэж, үргэлжлүүлэн 2022 онд “In da house: Come back” киног олонд хүргэсэн юм. Тэгвэл “In da house-3: In Korea” уран сайхны киног БНСУ-ын уран бүтээлчидтэй хамтран бүтээснээ ирэх гуравдугаар сарын 6-наас кинотеатруудаар үзэгчдийн хүртээл болгох гэж байна.
“In da house-3: In Korea” кинонд Монголын жүжигчдээс гадна Солонгосын А зэрэглэлийн жүжигчид тоглосны нэг нь нэрт жүжигчин Ги Жү Бун.
Өдгөө 70 нас хүрч буй Өмнөд Солонгосын алдарт жүжигчин Ги Жү Бун нь кино, театрын салбарт идэвхтэй ажиллаж, олон төрлийн дүрийг гарамгай бүтээж ирсэн туршлагатай жүжигчнээс гадна чадварлаг найруулагч, продюсер юм. Тэрбээр Сораболын урлагийн их Сургуульд кино, театрын жүжигчнээр суралцаж, 1977 онд өөрийн ах Ги Гүк Согийн хамт “76” нэртэй театр байгуулснаар уран бүтээлийн гараагаа эхэлжээ. Өнөөдрийг хүртэл Ги Жү Бун 90 гаруй бүрэн хэмжээний уран сайхны кино болон телевизийн олон ангит кинонд дүр бүтээсэн аж. Монголын үзэгчид түүнийг “Hotel by the river” (2018), “Right now, wrong then” (2015), зэрэг уран сайхны кинонуудаас гадна “All in” (2003), “Me too, flower!” (2011) тэргүүтэй цувралуудад тоглосон дүрүүдээр нь эчнээ мэдэх юм.
