УДБЭТ-ынхан шинэ оны анхны уран бүтээлээ үзэгчиддээ хүргэхээр тун завгүй ажиллаж байна. Театрын балет ангийнхан Португалийн нэрт балетмейстер Хьюго Виератай хамтран "Диваажин энд байна" хэмээх модерн балетыг шинээр бүтээж орчин үеийн балетын гайхамшгийг мэдрүүлэх гэж буй юм.
Балетмейстер Хьюго Виера 2012 онд манай улсад анх ирэхдээ Монголын балетын жүжигчидтэй модерн балет хамтран бүтээх талаар хэлэлцсэн бөгөөд эдүгээ ажилдаа ханцуй шамлан ороод буй нь энэ. Тэрбээр шинэ бүтээл хийхээр ганцаараа ирээгүй. УДБЭТ-ын урилгаар түүнтэй хамт шинэ он гармагц балетын жүжигчин Д.Одсүрэн, Хьюгогийн менежер Мануэл Гросс, туслах Педро Сантос нар ирсэн байна.
"Диваажин энд байна" модерн балетын гол дүрүүдэд ХБНГУ-д ажиллаж амьдарч байгаа балетын жүжигчин Д.Одсүрэн, УДБЭТ-ын балетын гоцлооч Г.Батчимэг, Б.Саруул, Э.Эрдэнэжаргал нар тоглох юм байна.
Сонгодог балет бол хэдэн зуун жилийн түүхтэй бөгөөд өгүүлэмж нь тодорхой байдаг бол модерн балет нь дэлхийн II дайны дараа үүссэн төдийгүй үзэгчдэд тухайн бүтээлийг олон талаас нь харж, өөрийнхөөрөө мэдэрч, таашаах боломжийг олгодгоор онцлог.
Балетмейстер шинэ бүтээлээ яагаад "Диваажин энд байна" гэж нэрлэх болсныг ирэх сарын 14, 15, 16-нд болох тоглолтоор мэдэх боломжтой бөгөөд уран бүтээлчид "Диваажин гэдэг чинь Дуурийн театрт л байна" хэмээн , үзэгчдийг урин даллаж байна.
Р.ОЮУНАА /Өдрийн шуудан/
