“Сочи 2014” өвлийн олимпийн наадамд оролцож байгаа Монголын баг тамирчид олимпийн тосгонд байрласан бөгөөд өчигдрөөс албан ёсны үйл ажиллагаанд оролцож эхэлжээ. Өчигдөр өглөө Монгол, Шинэ Зеландын багийн тугийг олимпийн тосгонд өргөх ёслолын үйл ажиллагаа явагдсан байна. Олимпод оролцож буй нийт тамирчдаас хамгийн эхэнд ийнхүү Монгол, Шинэ Зеландын далбааг мандуулжээ. Энэ ёслол нь тодорхой дэг жаягийн дагуу явагддаг албан ёсны үйл ажиллагаа бөгөөд тухайн орны ҮОХ, ОУОХ-ны албаны хүмүүс оролцдог аж.
