“Netflix” компани 2024 оны хоёрдугаар хагасын үзэлтийн тайлангаа танилцууллаа. Жилд хоёр удаа гаргадаг уг тайлан хэрэглэгчдийн нийт үзсэн цагийг киноны эсвэл цувралын үргэлжлэх хугацаагаар хуваах хэлбэрээр гаргадаг.
Тус тайлангийн дагуу өнгөрсөн оны хоёрдугаар хагаст хамгийн олон хүн үзсэн цуврал шоугаар “Squid Game” цувралын хоёрдугаар улирлын ангиуд тодорчээ. Тус уран бүтээл нээлтээ хийснээс ердөө зургаан хоногийн дараа улирлын хамгийн их үзэлттэй цуврал болж, 87 сая үзэлт авсан байдаг. Харин хамгийн их үзэлттэй киногоор “Carry on” кино 137 сая үзэлтээр тэргүүлсэн байна.
Түүнчлэн анимейшн кинонууд өндөр оролцоотой хэвээр байгаа бөгөөд шилдэг үзэлттэй 25 киноны 10 нь анимейшн байна.
Сонирхуулахад, “Netflix”-ийн гишүүд тус хугацаанд нийт 94 тэрбум цагийг уг платформд зарцуулсан нь өнгөрсөн жилийнхээс таван хувиар өссөн үзүүлэлт юм.
