Бүгд Найрамдах Итали Улсын Милан хотноо өнгөрсөн сарын хоёрдугаар сарын 25-наас энэ сарын 2-нд зохион байгуулсан Миланы загварын долоо хоногт Соёл, спорт, аялал жуулчлал, залуучуудын яам, Хүнс, хөдөө аж ахуй, хөнгөн үйлдвэрийн яамны дэмжлэгтэй Монголын ноос ноолуурын салбарын төлөөлөл “Go Mongolia” үндэсний брэндээр оролцлоо.
Дэлхийн шилдэг таван загварын долоо хоногийн нэгт зүй ёсоор тооцогддог Миланы загварын долоо хоног нь жилд хоёр удаа зохион байгуулагддаг. Манай загвар зохион бүтээгчдийн оролцсон “Fashion Hub” төсөл нь залуу дизайнеруудад чиглэсэн, тэдгээрийн ур чадварыг хөгжүүлэх, харилцан туршлага солилцох, хувцас загварын зөвлөх, дизайнеруудтай уулзсан үр өгөөжтэй үйл ажиллагаа болжээ.
Энэ үеэр байгуулсан “Go Mongolia” талбайд монгол ноолуурыг Италийн нэрт загварын сэтгүүл Vogue, бусад холбогдох хэвлэлийн байгууллагууд, инфлүэнсерүүд, дизайнер, худалдан авагчид, Миланы бүтик дэлгүүрүүдийн эздүүдээс гадна Миланы загварын долоо хоногийн Ерөнхийлөгч зэрэг зочид зочилж, Монгол ноолуурын онцлог, ондоошил, дизайнеруудын бүтээлүүдийг үзэж сонирхсон аж.
