2022 оноос олон нийтэд урлагийн боловсрол олгох чиглэлээр сургалт, үзвэр үйлчилгээ, урлагийн тоглолт, бусад төсөл хөтөлбөр, арга хэмжээнүүдийг зохион байгуулах зорилготойгоор байгуулагдсан “Bee” театрыг өдгөө театрын урлагт дурлагсад андахгүй.
Зохиолч П.Баярсайханы “Хүн гөрөөс” жүжгийг Ардын жүжигчин Б.Мөнхдоржийн найруулснаар хөшгөө нээж, Н.Болороогийн “Тусгал” жүжгийг Т.Цэнд-Аюушийн найруулгаар удаах уран бүтээл болгон толилуулсан тус театр моно буюу нэг хүний жүжгийн сар зарлаж, энэ хүрээнд Д.Мэндсайханы “Хүүхэлдэй”, Энэтхэгийн зохиолч Гириш Карнадын “Хэмхэрхий дүрснүүд”, Н.Болороогийн “Галт шувуу” жүжгийг толилуулж байв. Түүнчлэн өнгөрсөн онд Софоклын “Эдип хаан”, Шри Галидасын “Шакундала”, нийгэм-сэтгэлзүйн драмыг үндэслэгч Хенрик Ибсений “Хүүхэлдэйн байшин” драмын жүжгийг үзэгчдэд хүргэсэн.
Тэгвэл тус театр дараагийн уран бүтээлээ толилуулахад бэлэн болжээ. Тодруулбал, Австрийн зохиолч Петер Турринийн “Хархны ан” дарк комеди жүжгийг энэ гуравдугаар сарын 13-наас өдөр бүр тоглох гэж байна. “Хархны ан” жүжгийн продюсероор Д.Мэндсайхан, найруулагчаар Б.Баттулга нар ажилласан бол гол дүрүүдэд П.Мөнхдэлгэр, Э.Мандарьва нар тоглох юм байна.
