“Тагтаа” хочтой, үргэлж хүмүүст инээд бэлэглэдэг зөөлөн дулаан, гэгээлэг нэгэн уран бүтээлч бий. Тэр бол Р.Сүхболд. Хошин зан хүн бүрт байдаг ч түүнийгээ үзүүрт нь хүртэл илэрхийлж, түүгээрээ бусдад аз жаргал бэлэглэдэг нь ховор. Тийм ч болохоор үзэгчид түүнд хайртай байдаг биз ээ.
Р.Сүхболд уран бүтээлийн гараагаа сурагч ахуйдаа буюу 2009 онд МҮОНТ-ийн “Хэцүү анги” олон ангит кинонд тоглосноор эхэлжээ. 2014 онд СУИС-ийг төгссөн тэрбээр өнгөрсөн хугацаанд “Рашаантын 18”, “Би дурламаар байна”, “Манан зүсэгч”, “One night”, “Нөхөрт гарсаны маргааш”, “In da house”, “In da house-2: Comeback”, “Нийслэл хүүхэн: Бал сар”, “Хэрмэл жүжигчид”, “Тархи баригч”, “Алтан хүргэн”, “Фукуокт нэг удаа” зэрэг бүрэн хэмжээний уран сайхны кино, “Улаанбаатар, би чамд хайртай”, “Нийслэл хүүхэн” зэрэг телевизийн олон ангит кинонд тогложээ. Харин одоо тэрбээр жүжигчин Н.Баясаа, С.Батзориг, Г.Лхагвацэрэн, У.Цогтбаяр нарын уран бүтээлчидтэй хамтран “Xermel crew” байгуулж, “In da house-3: in Korea” киног БНСУ-ын уран бүтээлчидтэй хамтран бүтээж, мөн өөрөө гол дүрд нь тоглосныгоо үзэгчдэд хүргэж байна.
