Дэлхийн алдартай “Vogue” сэтгүүлээс жил бүр зохион байгуулдаг хувцас загварын хамгийн том арга хэмжээнүүдийн нэг “Met Gala” үдэшлэг уламжлал ёсоор жил бүрийн тавдугаар сарын эхний даваа гарагт зохион байгуулагддаг. Энэ дагуу өнөө жил уг ёслол тавдугаар сарын 5-ны өдөр нээлтээ хийхээр товлогдоод буй.
Уг ёслол Метрополитен урлагийн музейн Хувцасны институтийн үзэсгэлэн жил бүрийн “Met Gala” ёслолын сэдэвтэй уялдсан байдаг. Тэгвэл энэ жилийн үзэсгэлэн болоод “Met Gala”-гийн сэдэв “Superfine: Tailoring black style” байх юм.
Үзэсгэлэнг Африк судлалын профессор Моника Л.Миллерийн 2009 онд хэвлэгдсэн “Slaves to fashion: Black Dandyism and the styling of black diasporic identity” номоос сэдэвлэн, денди буюу 18 дугаар зуунаас өнөөг хүртэл хар арьст эрчүүдийн загвар, хэв маяг, гэрэл зураг, уран зураг, сийлбэр, хэвлэмэл зураг, киноны хэсэг зэргийг дэлгэн толилуулахаар болжээ.
Метрополитен урлагийн музейн Хувцасны институтийн үзэсгэлэнгийн зохион байгуулагчид орчин үеийн дендизмийн төлөөлөгчид гэж хэнийг хэлж болох талаар танилцуулсан бөгөөд үүнд, Фаррелл Уильямс, A$AP Rocky, Льюис Хэмилтон, Колман Доминго, Леброн Жеймс нар багтжээ.
Ташрамд дурдахад, Загварын ертөнцийн хамгийн том арга хэмжээнүүдийн нэг болох “Met Gala” нь Нью Йорк хотод байрлах Метрополитан урлагийн музейн Хувцасны институтэд зориулсан хандивын арга хэмжээ юм. Анх 1948 онд алдартай загварын нийтлэлч Элеанор Ламберт тус арга хэмжээг үүсгэн байгуулсан ба 1995 оноос хойш одоог хүртэл “Vogue” сэтгүүлийн эрхлэгч Анна Винтур хариуцан зохион байгуулж буй.
