Донателла Версачи гуч гаруй жилийн турш “Versace” брэндийн гол загвар зохион бүтээгчээр ажилласны эцэст албан тушаалаасаа буусан байна. Тэрбээр албан тушаалаа хүлээлгэн өгсөн нь “Versace” брэндийг өрсөлдөгч “Prada” нь худалдан авч магадгүй гэх ярианд хүч нэмжээ. Түүний ах Жианни Версачи 1997 онд Майами хотод буудуулж амь үрэгдсэний дараа Донателла “Versace” брэндийн хөдөлгөгч хүч болсон юм.
“Prada Group”-ийн эзэмшилд байдаг “Miu Miu” брэндийн дизайн болон имиж хариуцсан захирлаар ажилладаг Дарио Витале ирэх дөрөвдүгээр сарын нэгнээс Донателлагийн албан тушаалыг гүйцэтгэнэ. Донателла “Ах Жианнигийнхаа өвийг үргэлжлүүлэх нь миний амьдралд тохиосон хамгийн том нэр төрийн хэрэг. Тэр бол жинхэнэ гоц хүн байсан, би түүний тууштай зан чанар, сэтгэлийн хүчний хэсгийг ч болтугай эзэмшсэн гэж найддаг. Дарио Витале бидэнтэй нэгдэж байгаад би баяртай байна. “Versace”-ийг шинэ нүдээр харахад баяртай байна” гэжээ.
“Prada” болон “Versace” брэндүүд нэгдэж магадгүй хэлэлцээ хийгдэж байгаа гэх үетэй давхцан Донателла албан тушаалаа өгсөн нь сонирхол татаж буй. “Morningstar”-ийн шинжээч Дэвид Сварц “Versace” маш их бэрхшээлтэй тулгарсан. Тиймээс өөрчлөлт хийж байгаа нь гайхах зүйл биш” гэсэн юм.
