Уран бүтээлч З.Уянга, Д.Бурдаа, М.Баярмагнай нарын “Өнөөдөр” хамтарсан үзэсгэлэн Г.Занабазарын нэрэмжит Дүрслэх урлагийн музейд гарч байна.
Тус үзэсгэлэнд зураач бүсгүйчүүд дүрслэх урлагийн гурван өөр төрлөөр, нэг сэдвийн хүрээнд бүтээн туурвисан бүтээлээрээ нэгдэж, шилдэг 40 бүтээлээ дэлгэжээ. Тодруулбал, дүрслэх урлагийн үндсэн төрлүүд болох уран, монгол, зураасан зургаар нэг сэдвийг илэрхийлсэн гэсэн үг.
“Өнөөдөр” гэсэн сэдэвтэй эл үзэсгэлэн агуулгын хувьд өнгөрсөн болон ирээдүйг холбосон тухайгаа уран бүтээлчид тайлбарласан юм. Ийм холбоосыг зураач Д.Бурдаагийн “Гандангийн хүр”, “Сүм” гурван цуврал, “Цэвээнэй сарай”, З.Уянгын “Өнөөдөр”, “Маргааш”, “Өчигдөр”, “Сарны гэрэл дор”, “Хүрээ эхнэр” торгон бар, М.Баярмагнайн “Миний нутаг”, “Тэнгэр заяат түмэн”, “Орчил” зэрэг бүтээлээс харж болно.
Зураач Д.Бурдаагийн бүтээлүүдээс цул хүчтэй өнгөний ерөнхий тавилтууд болон тэдгээрийг хооронд нь холбосон хар өнгийн хүрээ зураас хэрхэн зохицож, дүрсийн хэмнэл давтамж үүсгэн нэгэн цул зохиомж үүсгэж байгааг харах боломжтой. Харин З.Уянгын бүтээлээс зураасан зургийн хөнгөн, хурдтай, санамсаргүй мэт шийдлүүд, техник арга ажиллагааны олон талт хувилбарыг мэдэрнэ. Тэгвэл Д.Баярмагнайн бүтээлээс уламжлалт монгол зургийн дэлгэр тавиу, задгай зохиомжийн шийдлүүд, мартагдаж буй нүүдлийн ахуй, биет бус соёлын өвүүдийг дүрсжүүлэн хойч үедээ үлдээх гэсэн чин эрмэлзлийг олж харах юм.
