“Хотын гудамж”, “Нэг өдөр”, “Бороотой шөнө”, “Дурсамж бүсгүй”, “Амьдрал чамд”, “Зочин” зэрэг хит уран бүтээлүүдийн эзэн, “Madness” хамтлагийн ахлагч, дуучин Ч.Оюунсайхан таалал төгсжээ.
Ч.Оюунсайхан 1994 онд трэш метал хөгжмийн урсгалаар хамтлаг байгуулж, улмаар 1997 онд “Хотын гудамж” дуугаа зохион сонсогчдод хүргэснээр “Madness” хамтлаг хөгжмийн урсгалаа “зөөллөж” рок урсгалаар уран бүтээл туурвих болжээ.
Ч.Оюунсайхан Дорноговь аймгийн Сайншандынх бөгөөд оюутан болж ирээд Улаанбаатар хотыг үзсэн анхны сэтгэгдэл нь 1990-2000-гаад оны залуусын чихэнд хоногшиж, аманд аялагдах болсон энэхүү “Хотын гудамж” хэмээх хит дуугаа зохиоход хүргэжээ. Харин эл дуугаа 11 нэгэн жилийн дараа буюу 2008 онд клиптэй болгосон байдаг. Мөн 2013 онд Гавьяат жүжигчин, “Харанга” хамтлагийн дуучин Х.Лхагвасүрэнтэй хамтран Улаанбаатар хотын ойн өдрөөр шинэ хувилбараар дуулснаа толилуулж байв. Ингэхдээ “Улаанбаатар хотын гудамж” нэртэйгээр дүрсжүүлж, олны хүртээл болгосон билээ.
Ч.Оюунсайхан агсны “Madness” хамтлаг өнгөрсөн хугацаанд дөрвөн цомог, гаруй видео клипийг сонсогчдодоо хүргэсэн байдаг. Хамгийн сүүлд өнгөрсөн 2023 онд “Хотын гудамж”, “Шүтээн”, “Дурсамж бүсгүй”, “Нутгийн уул”, “City”, “Нэг өдөр”, “Бороотой шөнө”, “Зочин”, “Уйдсан сэтгэл”, “Амьдрал чамд” зэрэг дуунуудаа багтаасан “The Essential” пянзаа Канад улсад хэвлүүлэн, олны хүртээл болгож байв.
