Энэтхэгийн уран бүтээлч РК буюу Рену Кумарын “Сэтгэлийн хэлхээс” үзэсгэлэнг Г.Занабазарын нэрэмжит Дүрслэх урлагийн музейд өнөөдөр нээлээ.
Уран бүтээлч РК нь манай улсад 2022 онд анхны бие даасан үзэсгэлэнгээ гаргаж байсан бөгөөд “Сэтгэлийн хэлхээс” нь түүний хоёр дахь үзэсгэлэн юм. Энэ удаагийн үзэсгэлэн нь уран бүтээлч карьерынхаа эхэн үеийн бүтээлээ дэлгэж буйгаараа онцлогтой юм.
Тэрбээр үзэсгэлэнгийнхээ талаар “Би уран бүтээлээ туурвиад 10 жил болж байна. Тэмдэглэлт ойгоороо үзэсгэлэнгээ дэлгэж буй нь надад онцгой, бас утга учиртай юм. Энэ үзэсгэлэн надад нэгэн цагт оршиж байсан байр сууринаасаа холдож, өнгөрснийг үдэн аяллаа цааш үргэлжлүүлэх тэр мөчийг мэдрүүлж байна. Би уран бүтээлийнхээ эхэн үед импрессионизм буюу хүний дотоод сэтгэл, хөдлөл, илэрхийллийг бүтээлдээ тусгаж байсан бол одоо хийсвэр сэтгэлгээний буюу абстракт төрлөөр бүтээлээ туурвиж байна. “Сэтгэлийн хэлхээс” үзэсгэлэнд импрессионизм, абстракт төрлөөр зурсан 10 гаруй зураг тавьсан. Энэ хоёр төрлийг хослуулан зурсан зураг ч бий. Тухайлбал, “Даруухан хүлээлт” зургийн цаад талд улаан, цэнхэр гэх мэт олон өнгийг уусгаж дэвсгэрлэсэн. Харин наад талд нь хайр дурлалаа хүлээж буй эмэгтэйн мэдрэмжийг илэрхийлэн зурсан юм. Би цаашид абстракт төрлөөр бүтээлээ хийнэ. Энэ төрлөөр зурахад бүтээл маань ганц утга илэрхийллэхээс илүү хүн бүр өөр өөрийн өнцгөөс зургийг нь минь харж, мэдрэх боломжтой юм.
“Сэтгэлийн хэлхээс” үзэсгэлэн нь энэ сарын 19-ныг дуустал үргэлжилнэ.
