Хөгжим Бүжгийн Коллеж нь Монголын хөгжмийн урлагийн боловсон хүчин бэлтгэх үйлсэд чухал үүрэг гүйцэтгэдэг уурхай гэхэд болно. Сонгодог урлаг тэр дундаа төгөлдөр хуурчдыг өндөр төвшинд бэлтгэж ирсэн баялаг түүхтэй. Тэр ч утгаараа Польшийн агуу их төгөлдөр хуурч, хөгжмийн зохиолч Ф.Шопены мэндэлсний 200 жилийн ойг тохиолдуулан 2011 оны хоёрдугаар сард “Ф.Шопен ба 21-р зууны Монгол” олон улсын мэргэжлийн төгөлдөр хуурчдын анхдугаар уралдааныг амжилттай зохион байгуулж байсан.
Тэгвэл өнөө жил буюу энэ сарын 23-28-ны өдрүүдэд Улаанбаатар хотод “Ф.Шопены ба 21-р зууны Монгол” олон улсын төгөлдөр хуурчдын хоёрдугаар уралдааныг ХБК, “Урбанек Монгол” ХХК санаачлан, Соёл спорт аялал жуулчлалын сайдын ивээл дор Боловсрол, шинжлэх ухааны яам, Польшийн элчин сайдын яам, Төгөлдөр сан, ДБЭТ, Монголын Урлагийн зөвлөл хамтран зохион байгуулах гэж байна.
“Ф.Шопены ба 21-р зууны Монгол” олон улсын төгөлдөр хуурчдын хоёрдугаар уралдаан нь Ф.Шопены уран бүтээлийг сурталчлах, улмаар төгөлдөр хуурчдын сургалтын дэгийн туршлага солилцох, авьяаслаг залуу төгөлдөр хуурчдыг нээн илрүүлэх, тэдний уран бүтээлч сэтгэлгээ, хөгжимдөх ур чадварыг дээшлүүлэх улмаар энэхүү уралдааныг төв Азийн нэр хүнд бүхий “А” зэрэглэлийн дөрвөн жилд нэг удаа болдог олон улсын уралдаан болгох зорилготой юм.
Энэ удаагийн уралдаанд БНСУ, БНХАУ, ОХУ-ын төгөлдөр хуурчид оролцохоор мэдүүлгээ ирүүлсэн бөгөөд “А” ангилалд 18-32 нас, “Б” ангилалд 17 нас хүртэл 30 гаруй төгөлдөр хуурч өрсөлдөх юм. Уралдааны шүүгчээр Варшав хотын Ф.Шопены нэрэмжит хөгжмийн академийн багш, нэрт төгөлдөр хуурч Эва Побловцки, Шанхай хотын Хөгжмийн Консерваторын орлогч захирал, нэрт төгөлдөр хуурч Зие Танг, Эрхүү хотын Ф.Шопены нэрэмжит хөгжмийн коллежийн захирал, төгөлдөр хуурч Анастасия Сергеевна Дурбажева нар ажиллана.
Уралдааны хөтөлбөр
“Ф.Шопен ба 21-р зууны Монгол” олон улсын төгөлдөр хуурчдын хоёрдугаар уралдааны хөтөлбөр.
– 02/23-нд Оролцогчдын сугалаа
11:00-12:00 /ХБК Концертын танхимд/
– 02/23-нд Нээлтийн ажиллагаа
13:00-16:00 /ХБК Концертын танхимд/
– 02/24-нд Уралдааны "А" ангилал 1-р шат
09:00-12:30, 14:00-18:00 /ХБК Концертын танхимд/
– 02/25-нд Уралдааны "В" ангилал 1-р шат
09:00-12:30, 14:00-18:00 /ХБК Концертын танхимд/
-02/26-нд Уралдааны "А" ангилал 2-р шат
09:00-12:30, 14:00-18:00 /ХБК Концертын танхимд/
-02/27-нд Уралдааны "В" ангилал 2-р шат 09:00-12:30,
"А" ангилал 3-р шат 14:00-18:00 /ХБК Концертын танхимд/
-02/28-нд Шагнал гардуулах ёслол, Гала тоглолт
18:00 УДБЭТ
Дэлгэрэнгүй мэдээллийг: 88110076, 99171031
