Америкийн кино урлагийн академиас “Ирэх жилийн “Оскар”-ын шагнал гардуулах ёслолыг Конан О’Брайен дахин хөтлөн явуулна” гэж даваа гараг /2025.03.17/-т мэдэгдлээ.
Тодруулбал, ирэх жилийн “Оскар”-ын наадам 2026 оны гуравдугаар сарын 15-нд болох бөгөөд 98 дахь удаагийн шагнал гардуулах ёслолыг Конан О’Брайен хөтөлнө гэж Академийн гүйцэтгэх захирал Билл Крамер болон ерөнхийлөгч Жанет Ян нар мэдэгдсэн байна. Учир нь Конан О’Брайены хөтөлсөн 97 дахь удаагийн ёслолыг үзэгчдээс сайн үнэлгээ авсан хэмээн үзсэн байна.
Ташрамд сонирхуулахад, энэ сарын 3-нд болж өнгөрсөн 97 дахь удаагийн “Оскар”-ын шагнал гардуулах ёслолыг телевизээр нийт 19.69 сая үзэгч үзсэн нь эл ёсолын үзэгчдийн тоо тав дахь жилдээ дараалан нэмэгдэж буй үзүүлэлт аж. Үзэгчдийн тоо өссөнд “Hulu” платформоор ёслолыг анх удаа шууд дамжуулсан явдал ч мөн нөлөөлжээ.
