Жил бүрийн гуравдугаар сарын 27-ны өдрийг 1962 оноос хойш Дэлхийн театрын өдөр болгон тэмдэглэдэг уламжлалтай. Энэхүү өдрийг ЮНЕСКО-гийн харьяа Олон улсын театрын институт санаачилсан байдаг. Уран бүтээлчид, жүжигчид, найруулагчид болон үзэгчид жил бүр театрын урлагийн үнэ цэнийг хүндэтгэн тэмдэглэдэг. Энэ өдөр бол дэлхийн өнцөг булан бүрд буй театрын урлагийн уран бүтээлчид хийгээд театрын урлагийн үнэнч үзэгч хэн бүхний баярын өдөр юм.
Эл өдөр театрын эх орон Францын Парис хотноо алдарт Сара Бернарын театрт дэлхийн олон орны зочид төлөөлөгчид, театрын зүтгэлтнүүд цуглаж урлагийн хамтлагууд өөр өөрсдийн жүжгээ тоглож, өвөрмөц сайхан баяр болсон түүхтэй. Наадамд оролцогчид “Эв нэгдэл, харилцан ойлголцол, энх тайван” уриан дор нэгдэж, тэндээс жил бүр театрын баярыг хүн төрөлхтний баяр болгохоор шийдвэрлэсэн байна.
Монгол Улсад 1990-ээд оноос энэ баярыг тэмдэглэдэг болж, тухайн жилдээ туурвисан шилдэг бүтээлүүдээ үзэгч түмэндээ толилуулж үзэсгэлэн, уралдаан зохион байгуулж, уран бүтээлчид тайлангаа тавьдаг, хүн бүрийн хүсэн хүлээдэг өвөрмөц гэгээлэг баяр болсон билээ.
Харин өнөө жил Дэлхийн театрын өдрөөр УДЭТ-ын уран бүтээлчид соёл судлалын “Эрдэнийн очир” нийгэмлэгтэй хамтран “Театрын өчигдөр ба өнөөдөр” үзэсгэлэнг дэлгэж, мөн “Хайлаас модны дор чамайг хүлээнэ” жүжгээ тоглох бол “Orfey” театрынхан “Амьдрахуй” хэлэлцүүлэг зохион байгуулж, Дорнын ард түмний амьдралын ухаан, орчин үеийн театрын чиг хандлагын талаар ярилцан, Хятадын нэрт зохиолч Үй Хуагийн “Амьдрахуй” постдрамын жүжгээ толилуулна. Мөн “Мөрөөдлийн театр”-ын уран бүтээлчид “Samsara: Тэртээх хоёр зүрх” драмын жүжгээ үзэгчдэд хүргэнэ.
