Олон улсын спортын сэтгүүлчдийн холбоо буюу AIPS-с жил бүр оны шилдэг фотог шалгаруулдаг уламжлалтай билээ. “AIPS Sport Media Awards 2024” уралдааны шалгаруулалтад 133 орны 2065 спортын сэтгүүлч бүтээлээрээ оролцсоноос эхний шатны дүн гарчээ. Энэ жилийн шалгаруулалтад Монгол Улсаас оролцсон гэрэл зурагчдаас Д.Нямбилэгийн “90” нэртэй бүтээл спортын үйл явдлын фото зураг ангилалд эхний шатанд шалгарсан байна. Уралдааны дараагийн шатанд шалгарсан бүтээлийг Олон улсын спортын сэтгүүлчдийн холбооноос энэ сард энэ хуудсаар дамжуулан зарлах юм.
Монголын спортын сэтгүүлчдийн холбооны Удирдах зөвлөлийн гишүүн Д.Нямбилэг нь “Харбин 2025” Азийн өвлийн спортын IX наадмын хэвлэл, мэдээллийн багийн ахлагчаар томилогдон ажилласан. Түүний хувьд өвөл, зуны Олимп болон Азийн наадмыг тус бүр гурван удаа сурвалжилснаас гадна чөлөөт, жүдо бөхийн Дэлхийн аварга шалгаруулах тэмцээн, Азийн аварга шалгаруулах тэмцээнд Монголын багийн хэвлэлийн багийн төлөөлөгчөөр ажиллаж байгаа юм.
Ташрамд дурдахад, Олон улсын спортын сэтгүүлчдийн холбооноос шалгаруулдаг оны шилдэг гэрэл зургийн уралдаанд дэлхийн 100 гаруй орны уран бүтээлчид идэвхтэй оролцдог нэр хүндтэй шалгаруулалтын нэг болсон. Уг уралдаанд 2020 онд Монгол улсаас анх удаа Олимпын тусгай сурвалжлагч, Соёлын Гавьяат зүтгэлтэн, гэрэл зурагчин Ч.Ганбатын бүтээл “Спортын гайхамшигт агшин” төрөлд шалгарч, гуравдугаар байр эзэлж байсан билээ. Тэгвэл энэ жилийн шалгаруулалтад Олимп, Азийн наадмын тусгай сурвалжлагч, “Харбин 2025” Азийн өвлийн IX наадмын Монголын багийн хэвлэлийн багийн ахлагч Д.Нямбилэгийн бүтээл эхний шатанд шалгараад байна.
