Монголын зохиолчдын эвлэлийн шагналт, яруу найрагч Арлааны Эрдэнэ-Очир өнгөрсөн намар өөрийн төрсөн нутаг Дорноговь аймгийн Улаанбадрах сумандаа жин тээж ном хүргэж байна гэж зүүдэлжээ. Энэ өдрөөс хойш зүүдээ ажил хэрэг болгохоор шийдсэн аж. Ингээд тэрбээр сумынхаа номын санг сэлбэх зорилгоор жингийн есөн цагаан тэмээ, номын 18 авдрыг бэлтгээд байгаа юм байна.
Тэгвэл ХХЕГ-ын Захиргааны удирдлага, Хангалт хариуцсан дэд дарга, хурандаа Ч.Сайнтөр Монголын зохиолчдын эвлэлийн шагналт, яруу найрагч Арлааны Эрдэнэ-Очирыг хүлээн авч уулзан ХХБ-ын 80 жилийн ойд зориулан хэвлүүлсэн "Дархан хилийн манаанд" түүхэн гэрэл зургийн цомог, “Монгол Улсын баатрууд”, “Эх орны дархан хил”, “Хилчин баатруудын дуун хөшөө” зэрэг номнууд болон ХХБ-ын 80 жилийн ойн хүндэтгэлийн концертын бичлэг зэргийг гардуулж өгчээ. Ийнхүү хилчдийн тухай ном тэмээн жингийн цуваанд багтахаар болжээ. Яруу найрагч А.Эрднэ-Очир бэлтгэсэн 18 авдраа номоор дүүргээд тун удахгүй төрсөн нутгаа тэмээн жингээр зорих ажээ.
