Өмнөд Солонгосын дуу зохиогч, реппер, “Big Bang” хамтлагийн ахлагч G-Dragon дуугаа сансрын уудамд илгээхээр болжээ. “Microsoft Azure OpenAI”-ийн “Sora” сервис, “Galaxy Corporation” компани, шинэ технологийн “KAIST” хүрээлэнтэй хамтарсан төслийн хүрээнд тэрбээр тусгай дуу, клип зохиож, задгай сансарт илгээх юм.
Энэ төсөл нь NASA-гийн харь гарагийнхантай холбоо тогтоох SETI (Search for Extraterrestrial Intelligence) хөтөлбөртэй холбоотойгоор хэрэгжинэ. Хөтөлбөрийн хүрээнд өмнө нь Английн “The Beatles” хамтлагийн дууг сансарт “явуулаад” байсан бөгөөд G-Dragon энэ төсөлд оролцсон анхны солонгос уран бүтээлч болж байгаа юм.
G-Dragon 2024 онд KAIST хүрээлэнгийн зочин профессороор уригдаж байсан. Тэр үед G-Dragon хиймэл оюун ухаан K-pop ертөнцөд хэрхэн нөлөөлөх талаар илтгэл тавьж байлаа.
Ташрамд дурдахад, G-Dragon-ы дэлхий тойрсон “Übermensch World Tour 2025” аялан тоглолт амжилттай үргэлжилж байна. Тавдугаар сарын 10,11-нд Токиод тоглолтоо хийгээд дараа нь Булакан, Осака, Макао, Тайбэй, Куала-Лумпур, Жакарта, Хонконгоор аялна.
