Үндэсний урлагийн их театрын бүжигчин М.Бямбаа “Миний ертөнц” бие даасан тоглолтоо ирэх тавдугаар сарын 11-нд хийх гэж байна. Тэрбээр эл тоглолтынхоо талаар “Бүжиг бол биеэр илэрхийлэгдэх урлагийн гайхамшиг. Бүжиг бол цаг хугацаа, хөдөлгөөн, хөгжил баясал, аз жаргал, гуниг харуусал дотор орших илэрхийлэл бөгөөд хүн бүр өөрийн авьяас, үзэл бодлоо биеийн хэлэмжээр таниулах боломжтой хүчирхэг урлагийн төрөл юм. Нэг зүрхтэй хамт олны минь сэтгэл зүрх, хөдөлмөр бүхэл бүтэн ертөнцийг илэрхийлэх болно” гэжээ.
Ташрамд дурдахад, М.Бямбаа 2004 онд Хөгжим бүжгийн коллеж төгссөнөөсөө хойш өнөөг хүртэл Үндэсний урлагийн их театраар овоглож буй. Түүнийг бүжгийн урлагт дурлагсад “Нарны домог”-ийн Алунгоо, “Монголын их хатдын туульс”-ын Сорхогтун хатан, “Цуутын цагаагч гүү”-ний Ээж зэрэг дүрүүдээр нь андахгүй. Түүнчлэн “Тамгагүй төр” жүжгийн Үнэгээс гадна “Зүрхээр наадагч, “Зэрлэг цэцэгсийн хүлэмж”, “Шуугиан таригч”, “Миний эхнэр тагнуулч” зэрэг уран сайхны кино, “Боловсрол” телевизийн “Гэрлэн дохио” олон ангит кинонд тоглосон авьяаслаг уран бүтээлч юм. М.Бямбаа театрынхаа уран бүтээлүүдэд оролцохоос гадна ОХУ-ын Большой театр, БНХАУ-ын Бээжин хотод Сувдан театр зэрэг дэлхийн алдартай театруудын тайзнаа ардын уламжлалт монгол бүжгийн урлагийг олон улсад сурталчилж байв. Түүнчлэн Зууны манлай бүжиг дэглээч, Төрийн соёрхолт Ц.Сэвжидийн нэрэмжит бүжиг дэглээч, гоцлол, цөөхүүл бүжигчдийн уралдааны тэргүүн байр, “World dance grand prix” олон улсын уралдаанаас гранпри шагнал хүртэж байлаа.
