Монголын дэлгэцийн урлагийн сор бүтээлүүдийг ур чадвар, авьяасаараа амилуулж, түүхэн киноноос авахуулаад орчин үеийн шилдэг драм, ээдрээт амьдралыг харуулсан олон ангит кино, цуврал бүтээлүүдэд бүтээсэн дүрүүдээрээ хэдийнээ олонд танигдаж, хайр хүндлэлийг хүлээсэн жүжигчин бол Ч.Болд.
Ч.Болд СУИС-ийг 2001 oнд Ардын жүжигчин, нэрт найруулагч Г.Жигжидсүрэнгийн удирлагад жүжигчин мэргэжлээр суралцаж төгсжээ. Уран бүтээлийн гараагаа 2001 онд “Бидний найзын дурлал” киногоор эхэлж, үргэлжлүүлэн “Овжин охид”, “Сүүгээр ариусдаг хорвоо”, “Үүлэн чөлөөний нар”, “Надтай гэрлээч”, “Боолын гэрээ”, “Бид дөрвийн хайр”, “Богд хаан”, “Ах дүүс”, “Бодлын хулгайч”, “Тоглоомын дүрэм”, “Босго тотго”, “Хүдэн”, “Луйвар”, “Мөрдөгч”, “Бохир ертөнц”, “Хүсэл”, “Долдугаар тусгай тасаг”, “Халуун мөс”, “Made in Ulaanbaatar”, “Орилоон”, “Сүүн замын сахиул”, “Академи ажиллагаа”, “Гангстерууд”, “Монголын сүүлчийн эзэн хаан”, “Өвөл”, “Хиртээгүй сарнай”, “Тэнгэр газрын заагт”, “Сүрэг”, “Эрвээхэйн сүүдэр”, “Gateway to the west”, “16 дахь хавар”, “Бидний араншин”, “Хавтаст хэрэг” зэрэг дотоодын болон олон улсын бүрэн хэмжээний болон олон ангит уран сайхны киноны гол болон голлох дүрүүдэд тоглосон байна.
Тэрбээр энэ дөрөвдүгээр сарын 18-наас “Халуун бороо” уран сайхны киноны дүрээр үзэгчидтэй “уулзах” гэж байна. Энэхүү уран бүтээлийг “Милл” кино компани Монголын гал сөнөөгчдийн эр зориг, хүнлэг сэтгэлийн бодит түүхээс сэдэвлэн бүтээжээ.
