Улсын хүүхэд, залуучуудын театр хавар цагийн шинэ уран бүтээлээ үзэгчдийн хүртээл болгохоор товоо зарлалаа. Тодруулбал, тус театрынхан алдарт зохиолч Уильям Шекспирийн “Ромео, Жульетта” сонгодог жүжгийш ирэх тавдугаар сарын 9-нөөс толилуулах юм байна. Жүжгийн ерөнхий найруулагчаар Б.Энхээ, зураачаар Г.Ганбаатар, продюсероор Гавьяат жүжигчин Н.Ариунболд, уран сайхны удирдагчаар Ардын багш Н.Ганхуяг нар ажиллажээ.
Дурлалт залуу Ромеогийн дүрд залуу жүжигчин Б.Түвшинбаяр, Жульеттад М.Батгэрэл нар тоглоно. Түүнчлэн Төрийн соёрхолт, Гавьяат жүжигчин Ц.Төмөрбаатар, Гавьяат жүжигчин Б.Нармандах, Соёлын тэргүүний ажилтан Ж.Даваасамбуу нар “Ромео, Жульетта” сонгодог жүжигт дүр бүтээх аж.
Сонирхуулахад, 1966 онд Улсын хүүхэд, залуучуудын театр хамгийн анх “Ромео, Жульетта хоёр” сонгодог жүжгийг толилуулж байсан бол ийнхүү төрөлх театрынхаа тайзнаа 59 жилийн дараа дахин амилуулах гэж байна. Тухайн үед жүжгийн найруулагчаар С.Гэндэн ажиллаж, Ромеогийн дүрд жүжигчин У.Готов, Жульеттад жүжигчин Б.Энхтуяа тоглосон түүхтэй.
Тэгвэл үүнээс хойш 30 жилийн дараа Урлагийн гавьяат зүтгэлтэн Ч.Найдандоржийн найруулгаар УДЭТ-ын тайзнаа “Ромео, Жульетта”-г тавьсан бөгөөд Гавьяат жүжигчин О.Гэрэлсүх, И.Одончимэг нар гол дүрийг бүтээсэн юм.
Харин 2012 онд “Сонгодог мюзикл продакшн”, Монгол-Францын соёлын төвтэй хамтран “Ромео, Жульета” дуурийг анх удаа эх хэлээрээ тавьжээ.
Түүнчлэн 2015 онд УДЭТ-ынхан үзвэрийн 85 жилийн жилийн нээлтээ “Ромео, Жульетта” эмгэнэлт драмын жүжгээр хийсэн бөгөөд Төрийн соёрхолт, Урлагийн гавьяат зүтгэлтэн Н.Наранбаатар найруулж, МҮОНТВ-ийн кино орчуулагч Х.Мэргэний орчуулгаар үзэгчдэд хүрсэн байна.
Мөн 2022 онд энэхүү Английн алдарт жүжгийн зохиолч Уильям Шекспирийн “Ромео, Жульетта хоёр” номыг орчуулагч Х.Мэргэний орчуулгаар хэвлэсэн байдаг.
