Жүжигчин Маша буюу Б.Хулангийн төрсөн өдөр өнөөдөр тохиож байна.
Б.Хулан 1997 онд эгч Б.Халиунтайгаа “Үнсгэлжин” хувцас загварын тэмцээнд оролцож, эгч нь загвар зохион бүтээгчээр гранпри шагнал хүртэж, харин өөрөө шилдэг арван загвар өмсөгчийн нэгээр шалгарч байв. Түүнчлэн 14-хөн настайдаа Монголын анхны фото миссээр тодорч, 1998 онд Монгол Улсын гоо охин болж байсан юм. Тэрбээр долдугаар ангийн сурагч байхаасаа жүжигчний мэргэжил эзэмшихээр шамдаж, улмаар СУИС-ийг төгсмөгцөө “Х ТҮЦ” продакшнаас уран бүтээл, ажлын гараагаа эхэлжээ.
Түүнээс хойш “Х ТҮЦ” продакшны тайзны уран бүтээлүүд, шоу тоглолтуудаас гадна “Ийм нэгэн дурлал-2”, “Болсон явдал”, “Секс эрх чөлөө”, “Бурхан өршөөг”, “Найз”, “Миний ах атаман”, “Ээж ээ, надтай гэрлээч”, “Бохир ертөнц”, “Хүсэл”, “Өртөө”, “Туршилтын хосууд”, “Өвлийн тууж”, “Шинэ жил”, “Цэцэг шиг нас”, “Сараана”, “Mongolian connection”, “Дэггүй хөрш” зэрэг бүрэн хэмжээний уран сайхны киноны гол болон голлох дүрүүдэд тогложээ. Хамгийн сүүлд тэрбээр “Хурд” хамтлагийн “Бүсгүй” дууны клипэнд тоглож, үзэгчидтэй “уулзсан” юм.
Дүрлэгэр алаг нүд, гайхамшигтай инээмсэглэлээр авьяас, ур чадвараа чимдэг үзэсгэлэнт жүжигчин бүсгүйд төрсөн өдрийн мэнд хүргэе.
