Дуучин Х.Оюунбилэгийн 1989 онд гаргасан “Чамайг тоссон зам” дууны 25 жилийн ой энэ жил тохиож байна. Бүтэлгүй хайрын тухай сэтгэл гэгэлзүүлсэн энэхүү дуугаар Х.Оюунбилэгийг хүмүүс сайн мэддэг, дуучны нэрийн хуудас болсон уран бүтээлийн нэг юм. 25 нас хүрч байгаа дуугаа Х.Оюунбилэг шинэчлэн бичүүлжээ.
Энэ талаараа саяхан жүжигчин, хөтлөгч Т.Өөдөөгийн шилдэг залуу уран бүтээлчдийг дэмжих “Alfa music” төслийн үеэр ярьжээ. “25 жилийн өмнөх бичлэгээ эргэж сонсоход би ямар муу дуулсан юм бэ гэж гайхсан. Тэр үед би тас гээд л аваад хаясан байгаа юм. Иймд дахин бичүүллээ” гэж Х.Оюунбилэг “Alfa music” төсөлд өрсөлдөж байгаа дуучин Хишгээтэй уулзахдаа ярьсан байна.
Дуучдыг ресторан, бааранд дуулахыг Х.Оюунбилэг дэмждэг бөгөөд “Энэ нь дуучдад үзэгчидтэй илүү ойрхон байж, тэдэнтэй харьцаж сурахад том сургууль болдог” гэдгийг залуу дуучин Хишгээд зөвлөжээ. Хишгээгийн хувьд урд хөршид гэрээгээр дуулж байсан бөгөөд Монголдоо ч ресторан, бааранд дуулахад туршлага хуримтлуулдаг талаараа мөн ярьж санал солилцжээ. Дашрамд сонирхуулахад Т.Өөдөөгийн зохион байгуулж буй “Alfa music” төслийн эцсийн шалгаруулалт 2 сарын 21-нд буюу өнөөдөр 21 цагт “Меторполис” шөнийн клубт болох бөгөөд Баярцэнгэл, Номин, Тэнүүн, Хишгээ, Чойжоо, Солонго нарын зургаан уран бүтээлчийн нэг нь “Alfa artist”-аар тодрох юм.
