Монгол Улсын Ерөнхийлөгчийн ивээл дор зохион байгуулсан “Монголчуудын соёлын өв: Гар бичмэл, архивын баримтын цуглуулга-VII” олон улсын хурал энэ сарын сарын 19-нөөс 22-ны өдрүүдэд ОХУ-ын Санкт-Петербург хотноо амжилттай болж өндөрлөлөө.
Хурлыг “Чингис хаан” үндэсний музейн захирал, академич С.Чулуун, Дорно Дахины гар бичмэлийн хүрээлэнгийн захирал, ШУА-ийн сурвалжлагч гишүүн И.Ф.Попова, Түүх, угсаатны хүрээлэнгийн захирал Л.Эрдэнэболд нар нээж үг хэлж, хурлын ач холбогдлыг үнэлж дүгнэсэн юм.
Тус хуралд ОХУ-ын Монгол судлалын томоохон төвүүд Моксва, Улаан-Үд, Казань, Иркутск, Элистагаас судлаачид, БНХАУ, Монгол Улсаас Үндэсний Номын сан, Чойжин ламын сүм музей, уЧингис хаану үндэсний музей, Богд хааны ордон музей, Занабазарын нэрэмжит дүрслэх урлагийн музей, Эрдэнэзуу музей, Багшийн сургууль, Хархорум музей, Түүх, угсаатны зүйн хүрээлэнгийн судлаачид оролцож, өөр өөрсдийн чиглэлээр илтгэл хэлэлцүүлснээс гадна, “Чингис хаан” үндэсний музейг төлөөлж таван судлаач оролцож гурван илтгэл хэлэлцүүлэн оролцлоо.
ОХУ-ын эрдэмтдээс Т.Д.Скрынников Монголын нууц товчоо дахь “Монг” үгийн утга, Р.М.Валеев Монгол судлаач А.В.Попова: “Хувь тавилан ба өв”, П.Н.Дудин В.И.Сурингийн өв: 1925,1928 оны газрын зургийн тухай, Ю.И.Елихина Г.И.Боровкагийн Туулийн хөндий дэх малтлагын Эрмитаж дахь цуглуулга тухай, М.В.Федорова Оросын угсаатны зүйн музейн Э.Э.Ухтомскийн бурханы шашны цуглуулга, А.Д.Цендина бичгийн эх сурвалж дахь Монголчуудын зан үйлийн онцлог, Д.П.Сумба Тувагийн үндэсний музейн сан хөмрөг дэх Монгол, Түвд гар бичмэлийн тухай, К.В.Орлова ОХУ-ын Тагнуулын тусгай архив дахь Монгол баримтын тухай зураг сонирхолтой илтгэлүүд хэлэлцүүлэв.
Энэхүү олон улсын хурал нь дэлхийн монгол судлалын ертөнцөд 2013 оноос эхлэн хоёр жил тутам тасралтгүй зохион байгуулагдаж буй бөгөөд, хуралд оролцогчдын илтгэл, олон сонирхолтой чухал баримтуудыг хэвлэн нийтлүүлээд байна.
