Нийслэлийн Засаг дарга бөгөөд Улаанбаатар хотын Захирагчийн ивээл дор “Улаанбаатар хотын бүжгийн спортын аварга шалгаруулах XXI тэмцээн” шинэхэн “MCU спорт комплекс”-д нээлтээ хийлээ.
Нийслэлийн Засаг даргын Тамгын газар, нийслэлийн Соёл, урлагийн газар, Монголын Бүжгийн спортын холбоо хамтран зохион байгуулж буй уг тэмцээн нь монголын бүжгийн спортын тамирчид, дасгалжуулагчдын ур чадварыг дээшлүүлэх, мэргэжлийн холбоо болон хамтлагуудын өрсөлдөх чадварыг олон улсын түвшинд хүргэх зорилгоор зохион байгуулж буй тус тэмцээнийг Нийслэлийн Засаг даргын Тамгын газрын Нийгмийн бодлогын газрын дарга Ш.Анхмаа нээж баг тамирчдад амжилт хүслээ.
Энэ удаагийн тэмцээнд Улаанбаатар хотод үйл ажиллагаа явуулж буй мэргэжлийн бүжгийн спортын холбооны гишүүн клубууд болон ерөнхий боловсролын сургуулиудын бүжгийн хамтлагуудас бүрдсэн 14 байгууллагын 500 гаруй бүжгийн спорт сонирхогч, хичээллэгчид оролцож байна.
Тэмцээний шүүгчээр Олон улсын “А” зэрэглэлийн 3 шүүгч буюу Дэлхийн бүжгийн спортын холбооны А зэрэглэлийн шүүгч, БНХАУ-ын бүжгийн спортын холбооны улсын шүүгч Ли Шигуо, Дэлхийн бүжгийн спортын холбооны А зэрэглэлийн шүүгч, Их Британи Умард Ирландын нэгдсэн хаант улсын шүүгч Жули Флинтам, Дэлхийн бүжгийн спортын холбооны А зэрэглэлийн шүүгч, Монголын бүжгийн спортын холбооны шүүгч Ганболдын Мөнхцэцэг болон Монголын Бүжгийн спортын холбооны шүүгчид ажиллаж байгаа бөгөөд тэмцээний шилдгүүд, аваргууд өнөөдөр тодорно.
