1997 онд үзэгчдийн хүртээл болсон “Титаник” кинонд 1912 онд хөлөг онгоц Атлантын далайд мөсөн уул мөргөсний улмаас амиа алдсан Уоллес Хартли болон түүний хамтран зүтгэгч хөгжимчид болох утсан хөгжмийн дөрвөл тоглож буй хэсэг хэд хэд дүрслэгддэг. Тэгвэл тус дөрвөлийн ахлагчийн тоглодог хөгжмийн зэмсэг болох хийлийг дуудлага худалдаагаар 54 мянган фунт стерлингээр заржээ.
“Киноны түүхийн жинхэнэ хэсэг” хэмээн тодорхойлсон уг хийл хөгжмийг өнгөрсөн бямба гараг /2025.04.26/-т Уилтшир гүнлэг дэх “Henry Aldridge and Son” дуудлага худалдааны ордонд үнэ хаялцуулжээ.
Эл хийл хөгжим киноны хэд хэдэн үзэгдэлд гардаг боловч үзэгчдийн сэтгэлд хамгийн ихээр хоногшсон нь хөлөг онгоц живж байх үед зорчигчдыг тайвшруулах зорилгоор “Nearer my god to the you” аяыг тоглож байх үе юм.
2013 онд Ж.Эванс-Жонс уг хийл хөгжмийг дуудлага худалдаагаар зарсан бөгөөд тэр цагаас хойш хувийн цуглуулагчийн цуглуулгад хадгалагдаж байжээ.
Дуудлага худалдааг зохион байгуулагч Эндрю Олдриж хэлэхдээ, үнэ хаялцуулж буй эд зүйлсийн үнэ дээд амжилт тогтоож, цуглуулагчид дэлхийн өнцөг булан бүрээс оролцож байгаа нь “Титаник” хөлөг дэлхий дахины сонирхлыг татсаар байгааг гэрчилж байна гэлээ. Хөлөг онгоцон дээр зорчиж явсан эрчүүд, эмэгтэйчүүд, хүүхдүүдийн амьдралын түүхийг дурсгалт эд зүйлсээр дамжуулан өгүүлж, тэдний тухай дурсамж хадгалагдсаар байх болно гэж тэрбээр нэмж хэлжээ.
