"Мөрөөдлийн театр"-ын авьяаслаг уран бүтээлчид маань "Шоу драм" хэмээх урлагийн нэгэн шинэ жанрыг хөгжүүлэхийн төлөө цаг наргүй хөдөлмөрлөж яваа тэдний тоглолт үнэхээр шинэлэг гэгээлэг байдлаараа аргагүй онцгойрч буйд үзэгчид ам сайтай байгаа.
УДЭТ-ын жүжигчнээр овоглогдож явсан Г.Эрхэмбаяр, Г.Алтаншагай нар өөрсдийн байгуулсан "Мөрөөдлийн театр"-ынхаа нээлтээ Оросын зохиолч Ванпиловийн "Ууган хүү" жүжгээс сэдэвлэсэн "Миний нууц хүү" жүжгийг тайзнаа тавьж анхны тоглолтоо үзэгчдэд хүргэсэн билээ. Энэхүү анхны уран бүтээлээсээ хойш "Хайртай бол эргэж хараарай", "Гээсэн хайраа аваарай", "Тэр чинь би", "Амьдрал өөрөө бэлэг" зэрэг шоу тоглолтоо үзэгч олондоо хүргэсээр энэ жил 3 жилийнхээ ойтой золгож байна.
"Мөрөөдлийн театрын"-хан 3 жилийн ойгоо тохиолдуулан "Шилдгийн шилдэг" үзүүлбэрүүдээсээ бүрдсэн тоглолтоороо үзэгч фэнүүддээ бэлэг барьж байгаа билээ. Тус шоу тоглолт нээлтээ хийсэн даруйдаа их хотын үзэгчдийг хэдийнээ байлдан дагуулж тасалбар нь тун эрэлт ихтэй байна. Мөн үзэгчид тус театрын хамт олонд "3 жилийн ойн баяр"-ын мэнд хүргэе хэмээн тоглолтын үеэр сэтгэлээ илэрхийлсээр тоглолтоос сэтгэл хангалуун гарч байна.
Энэ сарын 13-ны өдрөөс эхлэн өдөр бүр тоглогдож буй шоу драм хаалтын тоглолтоо энэ долоо хоногт хийх гэж байна. Тиймээс эрхэм үзэгчид та бүхэн яараарай.
Дашрамд сонирхуулахад, "Мөрөөдлийн театр"-ынхан 3 жилийн ойн баяраараа үзэгчдэдээ барих дараагийн бэлэг нь дэлгэцийн уран бүтээл гэнэ.
