Рок-н-роллын хатан хаан Тина Тернер 1988 онд Бразилийн Рио де Жанеро хотод тоглож байв. Тоглолтыг 188 мянган хүн үзэж, Тина Гиннесийн номонд бичигдсэн. Эл тоглолт бүх цаг үеийн түүхэн дэх хамгийн олон үзэгчтэй амьд тоглолт болсон юм.
Тэгвэл үүнээс 37 жилийн дараа тус хотод Леди Гага үнэгүй тоглолт зохион байгуулж, 2.1 сая хүн үзлээ. Ингэснээр Тина Тернерийн амжилтыг Леди Гага эвдэж байна.
Өнгөрсөн бямба гараг /2025.05.03/-т болсон тоглолт нь Леди Гагагийн “Coachella” наадамд үзүүлсэн шоу аж. Choachella-гийн дараа Гага уг тоглолтоо Мексикт, улмаар Рио де Жанеро хотод хийсэн энэ. Тайзан дээр Леонардо да Винчигээс санаа авч, дуурийн театр босгоод, дөрвөн үзэгдэл бүхий хүчирхэг шоу үзүүлсэн нь бүхий л хөгжим судлаач, хөгжмийн нийтлэлчдээс таван одоор үнэлүүлээд амжсан.
Ташрамд дурдахад, энэ онд Леди Гага “Mayhem” хэмээх шинэ цомгоо цацсан бөгөөд эл цомог амжилтаараа тэргүүлсээр байна. “Mayhem” цомог цоо шинэ, хүчирхэг концепцыг үзэгч, сонсогчдод хүргэж буй.
