Аугаа их Эх орны дайны Ялалтын 80 жилийн ойд зориулсан хоёр улсын хамтарсан үйл ажиллагаануудыг зохион байгуулахаар Монгол Улс, Улаанбаатар хотод хүрэлцэн ирсэн, ОХУ-ын Бүгд Найрамдах Буриад Улсын Соёлын сайд, хатагтай Соёлма Баяртуевна Дагаеватай уржигдар /2025.05.04/ нийслэлийн Соёл, урлагийн газрын дарга Э.Цэнд-Аюуш уулзалт хийлээ.
Уулзалтаар нийслэл Улаанбаатар хотын нутаг дэвсгэр дэх түүх соёлын үл хөдлөх дурсгалуудын сэргээн засварлалтын ажлууд болон нийслэлийн Улаанбаатар театрын уран бүтээлчдийн бүрэн хэмжээний тоглолтыг Буриад Улсын Улаан-Үд хотноо зохион байгуулахад хамтран ажиллах талаар нийслэлийн Соёл, урлагийн газрын дарга Э.Цэнд-Аюуш хүсэлт тавьж, санал солилцлоо.
Буриад Улсын Соёлын сайд хатагтай Соёлма Баяртуевна Дагаева уулзалтын үеэр Аугаа их Эх орны дайны Ялалтын 80 жилийн ойд зориулсан “Аугаа их Ялалт-Аугаа найрамдал” баярын тоглолтыг Улаанбаатар хотноо зохион байгуулахад дэмжлэг үзүүлэн ажиллаж буй нийслэлийн Засаг даргын Тамгын газар болон нийслэлийн Соёл, урлагийн газрын хамт олонд талархал илэрхийллээ.
Уулзалтад нийслэлийн Соёл, урлагийн газрын ЗУХ-ийн ахлах мэргэжилтэн Н.Өлзийбаяр, СҮУХ-ын ахлах мэргэжилтэн Б.Шашу, Монгол Улсын соёлын элч Х.Дамдинсүрэн, орчуулагч, хэл шинжлэлийн доктор, профессор Д.Цэцэгдэлгэр нар байлцлаа.
