“Харанга” хамтлаг байгуулагдсаны 25 жилийн ой энэ онд тохионо. Тэд “Best of Haranga- Үргэлж хамтдаа” тоглолтоо гуравдугаар сарын 8-нд тавих гэж байна. Эмэгтэйчүүдэд зориулсан энэ тоглолтыг “Харанга”-ынхан хамтлагийнхаа 25 жилийн ойн баярыг угтсан арга хэмжээнүүдийн эхлэл хэмээн онцлов. “Blue sky” цамхагийн “Лас Вегас” шөнийн клубт 400 хүнд зориулсан вип тоглолтын ерөнхий зохион байгуулагчаар “Стрингс” шөнийн клубийнхэн ажиллаж байна.
25 жилийн турш хамтдаа байсан “Харанга”-ынхан энэ хугацаанд зургаан цомог гаргажээ. Харин хэчнээн дуу төрүүлснээ тоолж үзээгүй гэж тус хамтлагийн гитарчин, урлагийн гавьяат зүтгэлтэн Ц.Чулуунбат ярилаа.
Тэд хамтлагийнхаа ойг угтаж олон үйл ажиллагаа зохион байгуулахаар төлөвлөжээ. Тавдугаар сард бөмбөрчин Н.Пүрэвдаш, зургадугаар сард гавьяат жүжигчин, дуучин Ц.Энхманлай, долдугаар сард дуучин Х.Лхагвасүрэнгийн бие даасан тоглолтыг зохион байгуулах гэнэ.
25 жил хамтдаа дуулж, хөгжимдөж, амьдралын жаргал, зовлонгоо хуваалцаж явсан, зүү орох зайгүй найз нар сайхан нөхөрлөлөө бодож, энэ тоглолтоо “Үргэлж хамтдаа” хэмээн нэрлэжээ. Үнэндээ манай улсын урлагийн түүхэнд анхны бүтэц бүрэлдэхүүнээрээ ийм хугацааг хамтдаа туулсан хамтлаг үгүй аж.
