Драмын урлагийн шилдгийг шалгаруулах “Гэгээн Муза-18” олон улсын театрын наадам нийслэлийн Засаг дарга бөгөөд Улаанбаатар хотын Захирагчийн ивээл дор тавдугаар сарын 16-24-нд болно.
Тус наадмыг хоёр шаттай зохион байгуулах бөгөөд эхний шатны шалгаруулалт нь энэ сарын 16-22-ны өдрүүдэд нийслэлийн театруудад болох аж. Хамгийн сүүлийн шат буюу улаан хивсний ёслол энэ сарын 24-ний өдөр “Корпорейт центр”-т 17:00 цагт болно.
Энэ жилийн наадмын хувьд Монгол Улсад хүүхдийн байгууллагын 100 жилийн ой тохиож буйтай холбогдуулан шинээр хүүхэлдэйн жүжгийн төрөл нэмэгдсэн аж.
Түүнчлэн энэ удаагийн наадмын зочин шүүгчээр Олон улсын театрын институтийн ерөнхийлөгч, Уганда улсын иргэн Жессика Каава, Япон Улсын Токио дахь “D’UOMA ex machina” театрын үүсгэн байгуулагч, найруулагч, судлаач Какумото Ацуши, Дани Улсын “Winter movement academy”-ийн үүсгэн байгуулагч, театрын хөдөлгөөний найруулагч, сургагч багш Денни Деннис, Олон улсын театрын институтийн гишүүн, жүжгийн зохиолч, театр судлаач Татъяана Азман нар урилгаар ирж ажиллах аж.
Мөн өнөө жил наадмын үеэр Дани улсаас ирсэн найруулагч “Физикл буюу биомеханик” сэдэвтэй сургалтыг зохион байгуулах юм байна.
