Кино сонирхогчид төдийгүй дэлхий нийтийн анхаарлыг татсан 86 дахь удаагийн “Оскар”-ын шагнал гардуулах ёслол болж өнгөрлөө. Анх 1929 оноос эхтэй “Оскар” түүхэнд нийт 3000 шагнал олгогдсон байдаг. Энэ жил гартаа загалмайтны илд барьж, таван нүд бүхий кино хальсан дээр зогссон, нүцгэн эрийн дүрсийг алтаар бүрсэн 50 ширхэг баримал эзэддээ очлоо.
“Оскар”- ын 86 дахь удаагийн шагнал гардуулах ёслолын үеэр хэд хэдэн сонирхолтой зүйл боллоо. Тухайлбал жүжигчид теарт пизза захиалж идэн олныг гайхшруулж байв. Тэгвэл “Ellen Degeneres” шоуны хөтлөгч Эллэн ёслолын үеэр гар утсаараа 12 хүнийг багтааж селфи буюу өөр рүүгээ харуулсан зураг авч твиттер хуудсандаа жиргэсэн нь дэлхийн хамгийн их ретвийт хийгдсэн зураг болж үлдэв. Тэрбээр уг зургийг оруулахдаа “Хэрвээ Брэдлигийн гар арай урт байсан бол энэ зураг “Оскар”-ын түүхэн дэх хамгийн агуу зураг болох байлаа” гэсэн тайлбар хийсэн байв.
Харин сонирхолтой нь уг зурагнаас болж твиттеэр хэдэн минут алдаа зааж, гацсан. Мөн жүжигчин Женнифер Лауренс улаан хивсний ёслолын үеэр унасан нь олны анхаарлыг татсан юм. Тэрбээр өмнө нь уг ёслолын тайзан дээр унаж байсан удаатай.
“Оскар”-ын түүх
1929 оноос эхтэй уг шагнал эхэндээ гавьяаны шагнал нэртэй байсан бол 1939 оноос жинхэнэ төрхөө олж “Оскар” нэртэй болсон. Харин баримлын санааг АНУ-ын кино академийн анхны гишүүн, “Метро Голдвин Мейр”-ын ахлах зураач, Седрик Гиббонс гаргасан бөгөөд найруулагч, зохиолч, жүжигчин Эмилио Фернандесийг нүцгэн натур болгож, уран барималч Жорж Стэнлигээр бүтээлгэсэн аж. Харин нэрнийх нь тухайд 1930-аад оны үед кино академийн гүйцэтгэх захирал, номын санч Маргарет Херрик уг баримлыг өөрийнхөө авга ах Оскартай адилхан харагдаж байна гэж хошигносны улмаас ийн нэрийдэх болсон гэдэг.
Анхны шагналыг 1929 онд Эмил Женнингс “The Last Command”, “The Way of All Flesh” кинонуудын дүрээрээ шилдэг жүжигчний шагнал хүртэж байв.
Харин 77 дахь удаагийн “Оскар”-ын шагнал гардуулах ёслолд Монголоос анх удаа Д.Бямбасүрэнгийн найруулсан “Ингэн нулимс” кино шилдэг баримтат кинонд нэр дэвшиж байв. “Оскар”-ын зогссон таван нүд бүхий кино хальс нь кино урлагийн амин сүнс болох жүжигчин, найруулагч, продюсер, техникч, зохиолчдыг бэлгэддэг аж. Харахад жижиг харагдах боловч уг шагналын өндөр нь 34 см бөгөөд 3.8 кг-ын жинтэй юм байна. Түүнийг 1982 оноос хойш Академийн шагналын мэргэжлийн компани болох “R.S .Owens & Company” урлаж байгаа юм. Тэд 50 ширхэг барималыг 3-4 долоо хоногт хийдэг байна.
Леонардо Ди Каприогийн хүсэл талаар боллоо
Дэлхийн киночид тэр дундаа бүсгүйчүүдийг дандаа гонсойлгодог эрхэм бол баян, царайлаг эрчүүдийн өнгийг тодорхойлдог Леонардо Ди Каприо.
Ингэж хэлэх учир нь тэрбээр “Оскар”-ын шагналд энэ удаагийнхтай нийлээд тав дахь удаагаа нэр дэвшсэн бөгөөд мөн л тайзан дээр биш суудал дээрээ үлдэв.
Түүний хувьд “Titanic”, “Gangs of New York”, “Catch me if you can”, “The Aviator”, “Shutter island”, “Blood Diamond”, “Inception”, “Django Unchained” зэрэг олон гайхалтай кинонд тоглож байв. Харин энэ жил тэрбээр “The Wolf of Wall Street” киногоороо 86 дахь удаагийн “Оскар”-ын шагналд шилдэг эрэгтэй гол дүрийн жүжигчин төрөлд нэр дэвшсэн боловч “Dallas Buyers Club” киноны гол дүрийн жүжигчин Мэтью Макконахид алдлаа.
Тэрбээр энэ шагналыг авна гэдэгдээ итгэлтэй байсан бөгөөд “Алтан бөмбөрцөг” наадмаас уг киногоороо шагнал авах үедээ “Би энэ жил “Оскар” авахгүй бол боож үэхэх байх. Түүний төлөө их олон жил хөдөлмөрлөлөө” гэж ярьсан.
Харин өчигдөр фэйсбүүк, твиттер гэх мэт цахим хуудсуудаар түүний өмнөөс харамссан хар мянган хүн “Оскар”-т нэр дэвшигчдийг хэн шүүдэг, тэд яагаад түүнд энэ шагналыг өгдөггүй талаар цэц булаалдав. Ямартай ч тэрбээр энэ удаад мөн л хоосон хоцорлоо. Харин өрсөлдөгчид нь “Лео чаддаг юм бол “Оскар” ав” гэж байгаа сурагтай.
Энэ бүхнийг харсан үзэгчид “Харрисон Форд, Том круз, Жонн Депп, Брэд Питт гээд л сайхан залуучуудад ер нь “Оскар” өгдөггүй юм байна” гэх хошигнол хүртэл цахим ертөнцөд явж байлаа. Тэгвэл тэдний хүсээд ч авч чадаагүй шагналаас татгалзсан нэгэн байна. 1973 онд жүжигчин Мэрлон Брандо “Загалмайлсан эцэг” киноны Вито Корлеоны дүрээр “шилдэг эрэгтэй дүрийн” шагнал хүртсэн. Гэвч тэрбээр “Оскар”-аас татгалзсан бөгөөд түүнээс татгалзсан цорын ганц хүн болсон юм.
“Gravity” гайхшруулав
Хязгааргүй сансарт үргэлжлэх “Gravity” буюу татах хүч кино энэ удаагийн “Оскар”-ын шагнал гардуулах ёслолын тод од нь байж чадлаа. Мексик найруулагч Альфонсо Куароны уг бүтээл 10 төрөлд өрсөлдөж, таван төрөлд нь шилдэг боллоо. Сандра Буллок, Жорж Клуни нарын амьлуулсан бидний мэдэхгүй огторгуйн талаар өгүүлэх энэ бүтээл шилдэг эвлүүлэг, дуу оруулга, дууны найруулга, кино зураг авалт, визуал буюу тусгай эффект зэрэг шагналуудыг авсан юм.
Түүнчлэн Альфонсо Куарон шилдэг кино найруулагч болсон бөгөөд энэ нь түүний долоо дахь “Оскар” аж. Ийнхүү татах хүч киноны багийнхан энэ удаагийн “Оскар”-ын шагналаас хэрэгтэй бүхнээ татаж чадлаа гэхэд болно.
Энэ удаагийн хамгийн эхний “Оскар”-ын эзнээр “Dallas buyer`s club” киногоороо Жаред Лето шилдэг эрэгтэй туслах дүрийн жүжигчний шагнал хүртлээ. Харин шилдэг кино төрөлд “12 years a slave” буюу “боолчлолд өнгөрүүлсэн 12 жил” шагналын эзэн боллоо. Мөн уг жүжигчин Лупита Ньонгд шилдэг туслах дүрийн эмэгтэй жүжигчин алдрыг авч ирсэн юм. Тэгвэл шилдэг эмэгтэй гол дүрийн жүжигчний шагналыг “Blue Jasmine” киноны Кейт Бланшетт хүртлээ.
Мөн багачууд гэлтгүй томчуудыг дурлуулж чадсан диснэйн бүтээл “Frozen” шилдэг бүрэн хэмжээний Animation төрлийн ялагч болж, шилдэг киноны дуу төрлийг ч мөн өнгөллөө. Харин шилдэг зохиол төрөлд “Her” буюу “тэр эмэгтэй” кино шалгарсан.
М.Санчир
Эх сурвалж:
