Малайзын Жохор хотноо Марко Поло болон Хубилай хааны тухай олон ангит, телевизийн уран сайхны кино хийж байгаа. Киноны уран бүтээлчид студидээ Монгол Улсаас Сингапурт суугаа Элчин сайд Б.Дэлгэрмааг урьжээ.
Тэд 30 мянган хавтгай дөрвөлжин метр бүхий талбайд зураг авалтын таван павильон шинээр барьж байгаа гэнэ. Ингэснээр 13 дугаар зууны Монголын Их Эзэнт гүрэн, Сүн улс, Марко Пологийн аялж явсан газруудыг цогцлоож байгаа аж.
Дэлхийн 20 орны 600 гаруй уран бүтээлч энэ түүхэн кинонд оролцож байгаа гэнэ. Киноны продюсерээр Холливудын нэрт продюсер Жон Фуско, Ричард Шаркей нар, захирлаар нь Даниэль Минахан ажиллаж байна.
Продюсер Р.Шаркей энэ киног бүтээхэд монголчуудын оролцоо чухал гэж үзэн, Сингапурт сурч, ажиллаж буй монголчуудаас кино зураг авалтад оролцуулах ажлыг зохион байгуулахыг ЭСЯ-наас хүссэн байна.
Энэ хүсэлтийн хариуд ЭСЯ боломжтой бүх талын дэмжлэг туслалцааг үзүүлнэ гэжээ.
Гадаад харилцааны яам